Ձեր վստահելի աղբյուրը

Հայաստանի տնտեսության համար 2017 թվականը հաջողված տարի էր: Այս մասին այսօր լրագրողների հետ հանդիպման ժամանակ ասաց Հայաստանի գործատուների հանրապետական միության գործադիր տնօրեն Գագիկ Մակարյանը:

«Տնտեսության զարգացման և բարեփոխումների կարևոր հիմքեր են դրվում և այդ սյուներն աստիճանաբար սկսել են ձևավորվել»,- նշեց նա՝ հավելելով, որ նախորդ տարվա տնտեսական ակտիվության աճը հիմնականում պայմանավորված էր արդյունաբերության զարգացումով:

Մասնավորապես, ըստ Գագիկ Մակարյանի, աճել է մետաղյա իրերի, շինարարական նյութերի,  պահածոների, հրուշակեղենի, մսամթերքի, ինչպես նաև  տրիկոտաժեղենի արտադրությունն ու արտահանում:  «Տուրիզմի զարգացման պատճառով՝ սպիտակեղենի և մսամթերքի արտադրության  ծավալները բավականին մեծացել են: Արտադրության աճը պայմանավորված է ոչ թե  նրանով, որ շարքային քաղաքացիներն են սկսել ավելի շատ սպիտակեղեն կամ միս գնել, այլ արտահանման ծավակներն են ավելացել, ինչպես նաև հյուրանոցներն ու հյուրատներն են դրանք ձեռք բերել»,- նշեց նա:

Գագիկ Մակարյանի խոսքով՝ Հայաստանում  դինամիկ կերպով զարգանում  է նաև ալկոհոլային խմիչքների արտադրությունն ու արտահանումը:  Ըստ նրա՝ եթե նախկինում Հայաստանից հիմնականում կոնյակ էր արտահանվում, հիմա՝ տարբեր տեսակի մրգային ալկոհոլային խմիչքներ ու գինիներ: «Այպիսով, 7,7% տնտեսական աճին, որ ներկայացնում են պետական մարմիները, սկզբունքորեն կարելի է հավատալ, քանի որ տնտեսական ակտիվությունն իսկապես  կա: Բացի այդ,  արտահանման ծավալներն են ավելացել՝ հասնելով մոտ 2 մլրդ 240 մլն-ի, ինչը կազմում է ներմուծման մոտ 54 տոկոսը: Այսինքն՝ եթե նախկինում մենք քննադատում էինք, որ արտահանումը կազմում էր ներմուծման ծավալների 1/3-ը կամ 1/4-ը, հիմա արդեն արտահանումն ավելացել է»,- ընդգծեց  նա:

Բանախոսը նաև կարևորեց տուրիզմի աճը, որը մուլտիպլիկատիվ նշանակություն է ունենում նաև այլ ոլորտների վրա:  Ըստ նրա՝ տուրիզմի աճով զարգանում է և հյուրանոցների բիզնեսը, և  սննդամթերքի, մսամթերքի, կիսաֆաբրիկատների արտադրությունը, և այլ ծառայությունները:

«Սակայն պետք է նշել, որ տնտեսական աճն արձանագրել ենք ոչ միայն կառավարության, այլ  նաև գործատուների շնորհիվ, որոնք կատարում են ներդրումներ, կարողանում են մրցունակ արտադրանք թողարկել , գնային քաղաքականաություն վարել, արտաքին շուկաները գրավել:  Իհարկե կարևոր են նաև ղեկավարության դիվանագիտական քայլերը, որի արդյունքում Հայաստանի վարկանիշը բարձրանում է»,- ասաց Գագիկ Մակարյանը: 

Միաժամանակ նա նշեց, որ Հայաստանն  իր աղքատության և գործազրկության ցուցանիշներով, դեռևս զիջում է տարածաշրջանի երկրներին: Նրա խոսքով՝  նախորդ տարի աղքատությունը չի նվազել և 2018 թվականին ևս չի նվազի.  «Հայաստանում աղքատությունը կազմում է 29, 4 տոկոս, իսկ դա նշանակում է՝  մենք այդ ցուցանիշով դեռևս կմնանք  տարածաշրջանում ամենավատ ցուցանիշ ունեցող երկիրը»:

Ինչ վերաբերում է գործազրկությանը, բանախոսը նշեց, որ տվյալները դեռ ամփոփված չեն, բայց հնարավոր է՝ 1-2 տոկոսով այն նվազի: