Ձեր վստահելի աղբյուրը

«Անկախ նրանից՝ ես եմ նախագահ լինելու, թե ոչ, հասարակությունը հսկայական ակնկալիքներ ունի։ Ակնկալիքները տարբեր են՝ սկսած նրանից, որ հանրության մի մեծ մասում կա իներցիոն մտածողություն, որ նախագահը մեկն է, որը վերևից ներքև կարող է  բոլոր հարցերին պատասխանել։ Եվ կա մյուս ծայրահեղությունը, երբ ասում են, որ նախագահի լիազորություններն այնքան քիչ են, որ նա ոչինչ չի կարող անել»,- լրագրողների հետ զրույցում այսօր այս մասին ասաց ՀՀԿ-ի կողմից նախագահի թեկնածու առաջադրված Արմեն Սարգսյանը։

«Կա մի մաս, որ ասում է՝ փոփոխությունների անհրաժեշտություն կա և եթե կարողանաս քո լիազորությունների սահմանում ինչ-որ բան փոխել, լավ կլինի։ Եվ կա մի մեծ զանգված, որ չի հավատում այդ փոփոխությանը։ Սա ինձ համար ամենացավալի երևույթն է, որովհետև ցանկացած փոփոխություն տեղի է ունենում, եթե քաղաքացին իրեն քաղաքացի է զգում»,- համոզմունք հայտնեց նախագահի թեկնածուն։

Արմեն Սարգսյանի խոսքով, ամենամեծ դժվարությունը Հայաստանում լինելու է այն, որ մարդիկ նորից հույս և հավատ ունենան։

Անդրադառնալով լրագրողների աշխատանքին՝ նախագահի թեկնածուն շեշտեց, որ չորրորդ իշխանությունը պետք է լինի անաչառ, ոչ կոռումպացված և ունենա իր սկզբունքները։