Ձեր վստահելի աղբյուրը

«Հայաստանում խնդիրների ցանկը բավականին մեծ է: Մեծ են նաև դրանք լուծելու հնարավարությունները»,-ՀԲԸՄ երևանյան գրասենյակում տեղի ունեցած հանդիպումից հետո լրագրողների հետ զրույցում հայտարարեց ՀՀԿ կողմից ՀՀ նախագահի թեկնածու առաջարկված Արմեն Սարգսյանը:

Նրա խոսքով, հասարակությունը շատ լավ տեղյակ է այդ խնդիրներին, ու ամենևին կարիք չկա, որ դրսից գա ինչ-որ մեկն ու ախտորոշի:

«Պետք է դրանք ի մի բերել, ունենալ հստակ ծրագիր տարբեր ուղղություններով՝ սկսած ժողովրդավարությունից, կոռուպցիայի դեմ պայքարից: Ինձ համար շատ կարևոր է կրթական համակարգի բարելավումը, որպեսզի մեր ազգային եռանդը տրվի դեպի նաև կրթություն, կարևոր է քաղաքացիական հասարակության ամրապնդումը, ինչպես նաև քաղաքացիներին հույսն ու հավատը վերադարձնելը»,-ասաց նա:

Ա. Սարգսյանի խոսքով, անելիքները շատ են, նույնիսկ բարեգործության ոլորտում:

Անդրադառնալով այն դիտարկմանը, որ իշխող ՀՀԿ-ին հասարակությունը չի վստահում, Ա. Սարգսյանն ասաց, այդ կարծիքին չէ, իսկ ընտրություն կատարելիս չպետք է առաջնորդվել այն մոտեցմամբ, թե ով է առաջդրել թեկնածուին:

«Ես ՀՀԿ անդամ չեմ, ընդհանրապես ես կուսակցական չեմ: Ես հույս ունեմ, որ ԱԺ-ում կամ ԱԺ-ից դուրս հասարակությունն իր քվեն կտա մարդուն: Ինձ համար պատիվ է, որ Հանրապետության նախագահն առաջարկել է իմ թեկնածությունը քննարկել»,-ասաց  ՀՀԿ թեկնածուն:

Նրա կարծիքով,  Հայաստանում ազգային երկխոսություն կարիք կա, եթե ԱԺ-ում ու դրանից դուրս քաղաքական ու ոչ քաղաքական ուժերը երկխոսություն չսկսեն, ապա հասարակությունը կդառնա ավելի մասնատված:

«Եթե  երկխոսություն չլինի, ապա առկա խնդիրներից որևէ մեկը լուծել հնարավոր չէ: Ժամանակն է, որ խոսենք, որովհետև մարտահրավերներն ավելի մեծ են, քան պատկերացնում ենք»,-ասաց նա: