Քրեական իրավունքը վաղուց նեղացել, գնացել է Սեֆիլյանի ու մյուսների գործից. Արայիկ Պապիկյան
Ժիրայր Սեֆիլյանի և մյուսների գործով դատախազն օրեր առաջ իր մեղադրական ճառում առաջարկեց 11 տարվա ազատազրկման դատապարտել Ժիրայր Սեֆիլյանին, 4,5 տարվա՝ Գևորգ Սաֆարյանի: Վերջիններիս պաշտպանները փետրվարի 15-ին լրագրողների հետ հանդիպմանը սա գնահատեցին որպես հաշվեհարդար:
Գևորգ Սաֆարյանի և Ժիրայր Սեֆիլյանի պաշտպան, փաստաբան Տիգրան Հայրապետյանի խոսքով՝ առաջադրված մեղադրանքներն իրականությանը չեն համապատասխանում: «Նախ՝ Սեֆիլյանին մեղադրում են 2015 թ. իբրև թե զանգվածային անկարգություններ կազմակերպելու մեջ, սակայն նրա նպատակը իշխանափոխությունն է եղել, ու քանի որ մեղադրանքը անհեթեթ էր, հիմնավորվածությունն էլ էր անհեթեթ: Փաստաբանի խոսքով՝ զանգվածային անկարգության նախապատրաստությունն այնքան լղոզված մեղադրանք է, որ որևէ մեկին չի մեղսագրվում, թե՝ եթե նպատակը եղել է դա, կոնկրետ Սեֆիլյանն ինչ պետք է աներ, Սաֆարյանն՝ ինչ: Վանաձորում գտնում են մի քանի դրոշակի ձող, բերում են, Սեֆիլյանի մեղադրանքի հիմքում դնում, կամ դեղին կասկաները, որ օգտագործվում էին Մաշտոցի պողոտայի ծածկած հուշարձանի հետ կապված ակցիաների ժամանակ, դարձյալ այս մեղադրանքի հիմքում են դրվել»,- ասաց նա:
Հայրապետյանի խոսքով՝ Սեֆիլյանին մեղադրում են զենքի ապօրինի շրջանառության մեջ, իբրև փորձել է շենք-շինություն զավթել: Սակայն անգամ այս մեղադրանքից չի երևում, որ նրա նպատակը եղել է զավթել շենք-շինություններ, հետո պետությանը պահանջներ ներկայացնել. կես ցուցմունք կա, որ իբր պետք է զորամասը գրավեին, զենքեր վերցնեին, որ հետո հեռուստաաշտարակը գրավեին: «Մի քանի հոգի, Սեֆիլյանից անկախ, երկու գործակալներ ներդրվում են, հանձնարարություն են ստանում. նրանցից Հովհաննես Պետրոսյանը հենց դատավարության ժամանակ ասաց, որ Սեֆիլյանի բռնած քաղաքական ուղղությունն իրեն դուր չի գալիս, և չէր ցանկանա, որ Սեֆիլյանն իր քաղաքական գործունեությունը հաջողությամբ ավարտեր: Հանձնարարություն են ստանում ներդրվելու, ամբողջ մեղադրանքը գնում է հեռախոսային խոսակցությունների գաղտնալսման իբր ապացույցներով, որոնք կապ չունեն Սեֆիլյանի հետ»,- ասաց նա:
Փաստաբանը նշեց, որ Սեֆիլյանից հեռու տարածության վրա են եղել հեռախոսային խոսակցություններ, այդ երկու գործակալների միջև, ընդ որում՝ նա, ով սկսել է այդ խոսակցությունը, ով զենքը տեղից տեղ է տարել, այսօր ազատության մեջ է, իսկ մյուսները կալանավորված են: Հետագայում պարզվել է, որ մյուս գործակալը՝ Սմբատ Գալոյանը, հանդիպել է Հիմնադիր խորհրդարանի արմատական անդամների հետ՝ Ալեք Ենիգոմշյանի, Սյուզան Սիմոնյանի հետ, առաջարկել իր օգնությունը, ասել, որ ինքը 200-300 անձ ունի: Սեֆիլյանի պաշտպանները խնդրել են Սյուզան Սիմոնյանին, Ալեք Ենիգոմշյանին վկա կանչել, Գալոյանին հարցաքննել, դատարանն այս բոլոր միջնորդությունները մերժել է, և դատավարությունն անցել է խախտումներով: «Այդ դատավարությունից հետո քրեական դատավարության օրենսգիրքն արդեն բանի պետք չէ. Սեֆիլյանի դատավարության ժամանակ դա ոտնահարվեց, 20 տարվա պրակտիկան նետվեց մի կողմ»,- ասաց նա:
Ժիրայր Սեֆիլյանի պաշտպան, փաստաբան Արայիկ Պապիկյանը հիշեցրեց գործի նախնական փուլերը, նշեց, որ Սեֆիլյանին, Սաֆարյանին և մի շարք այլ անձանց սկսել են հետապնդել նախ՝ ԱԱԾ-ում, ընդ որում՝ սկսել են հետապնդումը, հետո դատարանից թույլտվություն ստացել այն օրինականացնելու համար, բնականաբար՝ հետին ամսաթվով: Պապիկյանն ասաց, որ կան հետապնդման փաստեր. հետապնդումը սկսվել է 300-րդ՝ իշխանությունը զավթելու հոդվածով, որը քաղաքական հոդված է: Փաստաբանի խոսքով՝ ԱԱԾ-ն երկար ժամանակ հետապնդում էր Սեֆիլյանին, Սաֆարյանին, նրանց նամակագրությունը, էլ փոստը հսկողության տակ է եղել, հեռախոսազրույցները լսվել են: Ավելի քան 10 ամիս «Իշխանությունը զավթելու» հոդվածով հետապնդումներից հետո գործը հանձնվում է Գլխավոր դատախազությանը, որտեղից ուղարկվում է Քննչական կոմիտե:
«Տեսնելով, որ այս հոդվածով որևէ փաստ չկա, միայն նրանց հրապարակային ելույթներն են կամ հարցազրույցները, որոնցով չի կարելի այդ արարքը որակել որպես իշխանությունը բռնությամբ զավթելու հանցավոր արարք, որոշում են գործ հարուցել «Զանգվածային անկարգություններ նախապատրաստելու» հոդվածով: Քննչականը սկսում է գործողությունները, բայց ամենաարտառոցն այն է, որ ԱԱԾ-ն զուգահեռաբար շարունակում է 300 հոդվածով՝ զուգահեռաբար, ոչ թե այդ քրգործի շրջանակներում, այլ նախապատրաստված նյութերով շարունակել քննություն տանել, այսինքն՝ հետապնդել Սեֆիլյանին, այս հետապնդումները շարունակվում են ըստ գործում առկա, մեզ հասանելի նյութերով ևս 5-6 ամիս, այսինքն պետական 2 մարմին զուգահեռաբար հետապնդում են իրականացնում»,- ասաց նա:
Պապիկյանը նշեց, որ այստեղ գործ են ունեցել ոչ թե երկու, այլ ավելի մեծ թվով գործակալների հետ, ովքեր ակտիվորեն աջակցում էին երկու ինքնաձիգի տեղաշարժին: Փաստաբանն ասաց՝ խմբում կան 10 հոգի, որոնցից Սեֆիլյանը ճանաչում է միայն մեկին, իսկ շատերը միմյանց էլ չեն ճանաչում, սակայն մեղադրանք է առաջադրված նաև «կազմակերպված խմբով հանցանք կատարելու» համար, իսկ նախաքննության ավարտից յոթ օր առաջ Սեֆիլյանին առաջադրվում է ևս մեկ մեղադրանք՝ շենք-շինություններ զավթելու մեղադրանքը, որն առաջադրում են, գործը ավարտում, ուղարկում դատարան: Պապիկյանն ընդգծեց՝ նման «հրատապության» շնորհիվ անձը առաջադրված մեղադրանքից պաշտպանվելու համար ժամանակ չի ունենում: Փաստաբանի խոսքով՝ Սեֆիլյանի բոլոր հեռախոսազրույցները, անգամ իրենց հետ, գաղտնալսվել են, սակայն դրանցից մեկ բառ անգամ չկա մեղադրանքում:
«Սեֆիլյանին առաջադրված մեղադրանքների մեջ քրեական իրավունք չկա, քրեական իրավունքը վաղուց նեղացել, գնացել է այս գործից: Այդ իրավունքը չի եղել նաև դատարանում»,-ասաց նա:
Հարակից հրապարակումներ`
Լրահոս
Տեսանյութեր
Գիշեր-ցերեկ կաշխատենք, միայն առաջվա Հայաստանում ապրենք. Քաղաքացիները՝ աշխատաժամանակի կրճատման մասին
