Ձեր վստահելի աղբյուրը

Երևանի ավագանիում տեղի ունեցած հայտնի միջադեպից մեկ օր առաջ Նուբարաշեն վարչական շրջանի բնակիչների բողոքով այնտեղ են եղել քաղաքապետարանի ներկայացուցիչները և ծանոթացել առկա իրավիճակին: Գարշահոտությունը վերացնելու նպատակով քաղաքապետարանը մեկ շաբաթ ժամանակ է խնդրել, ինչից հետո տեխնիկան տեղափոխել է խնդրահարույց տարածք: ԱԺ-ում լրագրողների հետ զրույցում այսօր այս մասին ասաց ՀՀԿ խմբակցության ղեկավար Վահրամ Բաղդասարյանը՝ անդրադառնալով հանրապետական մի քանի տղամարդկանց՝ «Երկիր Ծիրանի» խմբակցության անդամ Մարինա Խաչատրյանին ծեծի ենթարկելու հայտնի միջադեպին:

«Բնակիչները հավատացել են և ասել, որ եթե մեկ շաբաթից խոստանում են վերացնել խնդիրը, իրենք բավարարված են: Դրանից հետո «Երկիր Ծիրանիի» անդամները հանդիպել են Նուբարաշենի բնակիչներին, ասել են՝ ինչ մի շաբաթ, նրանց չի կարելի վստահել, ակցիա ենք կատարում»,- պատմեց պատգամավորը:

Քաղաքապետարանում նախօրեին տեղի ունեցած միջադեպը ոչ թե ակցիա որակեց, այլ միտում՝ մնալու ուշադրության կենտրոնում: Նրա խոսքով, Հերոստրատը նույպես տաճարը վառեց, որպեսզի պատմության մեջ մնա:

«Նրանք այլ ելք չունեին: Ես այնտեղ հայ կնոջ կերպարն չտեսա: Եթե պայքարն այդ ձևով պետք է լինի, դա անընդունելի է՝ փորձել կեղտաջուրը շփել մարդկանց վրա: Ես դատապարտում և քննադատում եմ նմանատպ երևույթները: Դա միտում էր՝ խանգարելու ավագանու աշխատանքը: Եթե ես տղամարդ եմ, ձեռքերս գրպաներումս դրած, պետք է գան ինձ ապտակե՞ն, ես էլ Աստվածաշունչ կարդացող մարդ եմ, մյուս երեսս էլ դեմ անեմ, որ ապտակե՞ն»,- հռետորական հարց հնչեցրեց ՀՀԿ խմբակցության ղեկավարը:

Վահրամ Բաղդասարյանը լկտիություն որակեց Մարինա Խաչատրյանի այն հայտարարությունը, որ իր նկատմամբ սեռական ոտնձգություն է կատարվել: «Լկտիությունը պետք է չափ ունենա: Սա առաջին դեպքն է քաղաքական դաշտում, որ նման հայտարարություն է արվում»,- շեշտեց նա: