Ձեր վստահելի աղբյուրը

Երեկ ադրբեջանական մամուլում մեծ արագությամբ շրջանառվեց լուրը, որ իտալացի նախկին պատգամավոր Լուկա Վոլոնտեին Միլանի դատարանը արդարացրել է: Վերջինս ներգրավված է ԵԽԽՎ-ում Ադրբեջանի շուրջ կոռուպցիոն սկանդալում և համաձայն զեկույցների՝ Ադրբեջանից ստացել է 2.39 միլիոն եվրո՝ այդ երկրի շահերը առաջ մղելու համար:   Ադրբեջանցի պատգամավոր Էլհան Սուլեյմանովը, ում անունը նույնպես կապված է այս սկանդալի հետ, շտապել էր հաղորդագրություն տարածել, որ Վոլոնտեն արդարցվել է` պաթետիկ կերպով նշելով, որ «ցավակցում է իր, Ադրբեջանի և Վոլոնտեի դեմ զրպարտանքի կազմակերպողներին և բոլոր նրանց, ովքեր աջակցել են Հայաստանին»: 

Ավելին, Ադրբեջանի նախագահի աշխատակազմի հանրային կապերի վարչության պետ Ալի Հասանովը, մեկնաբանելով Միլանի դատարանի որոշումը, սպառնացել է իրավական ընթացակարգեր սկսել բոլոր նրանց դեմ, ովքեր իրականացրել են հակաադրբեջանական արշավը:

Նա նշել է, որ այդ տեղեկատվություն տարածող կենտրոնը` «Կազմակերպված հանցագործության և կոռուպցիայի մասին զեկուցման նախագիծը»՝ OCCRP, ստեղծվել է հակաադրբեջանական ուժերի կողմից և Ադրբեջանի միջազգային հեղինակությունը սևացնելու նպատակ է հետապնդում:

Այսօր OCCRP-ի խմբագիր և համահիմնադիր Դրյու Սալիվանը թվիթերի իր էջում բավականին կոշտ պատասխանել է Ալի Հասանովին:

«Կոռումպացված, ընտանիքի կողմից ղեկավարվող Ադրբեջանին և պարոն Հասանովին, ով սիրում է սպառնալ լրագրողներին` Դուք սխալվում եք: Պարոն Վոլոնտեն արդարացվել է փողերի լվացման մեղադրանքներից, բայց դեռևս մնում են կոռուպցիայի հետ կապված մեղադրանքները, այն փողերի համար, որ ձեր երկիրն ուղարկել է նրան: Սպասեք ավելիին»,- գրել է Սալիվանը:

Իսկ Ադրբեջանցի հայտնի հետքննող լրագրող Խադիջա Իսմայիլովան Ադրբեջանում այս լուրի շրջանառումն անվանել է «PR աղետ»:

«Սպառնալով լրագրողներին և ստելով դատական գործի մասին նրանք պարզապես հիշեցնում են օտար մամուլին կաշառքի մասին և ևս մեկ առիթ են տալիս խոսել Ադրբեջան-ԵԽ կոռուպցիայի մասին»,- գրել է նա թվիթերում:



Հիշեցնենք, որ ԵԽԽՎ-ն որոշում կայացրեց ստեղծել արտաքին հետաքննության մարմին՝ ԵԽԽՎ-ում պատգամավորների շրջանում կոռուպցիոն պնդումներն ուսումնասիրելու համար։ Մարմինը գործում է գաղտնիության պայմաններում։ Ի սկզբանե նախատեսվում էր, որ խումբն իր ուսոմնասիրության արդյունքները պետք է ներկայացներ մինչև 2017թ․-իդեկտեմբերի 31-ը, սակայն ժամկետը երկարացվեց ու զեկույցը վեհաժողովին կներկայացվի ապրիլյան նստաշրջանում։