Ձեր վստահելի աղբյուրը

Վերաքննիչ քրեական  դատարանում փետրվարի 16-ին շարունակվեց ԼՂՀ ՊԲ նախկին հրամանատար, «Իգլա»-ի գործով ամբաստանյալ Սամվել Բաբայանի գործով վերաքննիչ բողոքի քննությունը: Բաբայանի շահերի պաշտպան Ավետիս Քալաշյանը միջնորդություն ներկայացրեց դատարանին՝ Առաջին ատյանի դատարանում հետազոտված մի քանի ձայնագրություններ կրկին հետազոտելու հարցով:

Միջնորդությունը, սակայն, մերժվեց: Նախագահող դատավոր Սևակ Համբարձումյանը, միջնորդությունը մերժելու որոշումը մեկնաբանելով, նշեց, որ Առաջին ատյանի դատարանում հետազոտված ապացույցները կրկին հետազոտվում են, երբ ոչ լիարժեք են հետազոտվել, կամ կողմը ինչ-ինչ պատճառներով հնարավորություն չի ունեցել այդ ժամանակ իր դատավարական լիազորություններն իրականացնելու:

Դատավորը հայտնեց, որ այդ ապացույցները լիարժեք հետազոտվել են, հակառակ պարագայում կողմերը հնարավորություն ունեին իրենց բողոքներում ու հիմնավորումներում այդ մասին նշել: «Եթե այդ ապացույցների վերաբերյալ դատական ակտում չկա որևէ նշում, այսինքն՝ բաց է թողնվել, դա չի նշանակում, որ այդ ապացույցը վերաքննիչ դատարանում կրկին պետք է հետազոտվի: Պաշտպանության կողմը լիարժեք հնարավորություն ունի բաց թողած մասերը շեշտելու, դատարանի ուշադրությունը դրա վրա հրավիրելու, ճառում այդ մասին մատնանշելու, և բնավ անհրաժեշտություն չկա հետազոտված ապացույցը նորից հետազոտելու»,- ասաց նա:

Բաբայանն արձագանքեց, որ ներկայացված ապացույցները չեն հետազոտվել, որովհետև եղած փաստերը, որ արձանագրված են թղթերի վրա, չեն ամրագրվել, և որևէ ձևով բացատրություն չի տրվել այդ մասին: «Ոչ մի փաստ չկա, որ ես ինչ-որ ձևով կապ ունեմ այդ գործերի հետ, բայց իրենք մեղադրական են տվել: Ես ներկայացնում եմ փաստերով, ապացույցներով, դրվագներով, ոչ թե իմ ենթադրություններով, իրենց ձայնագրած տեքստերով ապացուցում եմ իմ անմեղությունը, Դուք, մերժելով, այդ հնարավորությունից ինձ զրկում եք»,- ասաց նա:

Դատարանից հնչեց մեկնաբանություն, որ պետք չէ հետազոտումն ու գնահատականը շփոթել. ներկայացված ապացույցները հետազոտված են: Այս գործով 3 տարվա ազատազրկման դատապարտված Սանասար Գաբրիելյանը դատարանին հայտնեց, որ իր շահերը կարող է ինքնուրույն պաշտպանել, ուստի պաշտպանի կարիք չունի: Դատարանը դա ընդունեց որպես հայտարարություն:

Դատարանն անցավ դատական վիճաբանությունների ընդունմանը: Հաշվի առնելով, որ Սամվել Բաբայանը վատառողջ էր, դատարանի որոշմամբ նա իր պաշտպանական ճառը կներկայացնի հաջորդ նիստին, որը տեղի կունենա փետրվարի 26-ին: