Ձեր վստահելի աղբյուրը

ՀՀ ԱԺ նախագահ Արա Բաբլոյանի որոշմամբ՝  ՀՀ Սահմանադրության 100-րդ և «Ազգային ժողովի կանոնակարգ» ՀՀ սահմանադրական օրենքի 41-րդ հոդվածների համաձայն` այսօր  ՀՀ ԱԺ  «Ելք» խմբակցության պատգամավորների նախաձեռնությամբ  կգումարվի ՀՀ ԱԺ արտահերթ նիստ:

Օրակարգում ընդգրկված է «ՀՀ հարկային օրենսգրքում փոփոխություններ և լրացումներ կատարելու մասին» օրենքի նախագիծը:

Մինչ հարցի քննարկմանն անցնելը՝ ԱԺ նախագահ Արա Բաբլոյանը հայտարարեց, որ Սահմանադարական անդամի թափուր պաշտոնում նշանակվելու համար ներկայացվել է Հրայր Թովմասյանի թեկնածությունը։

Բաբլոյանը նշեց նաև, որ ԱԺ պետական-իրավական և մարդու իրավունքների պաշտպանության հարցերի մշտական հանձնաժողովի նախագահ Հրայր Թովմասյանը ներկայացրել է պաշտոնից հրաժարականի դիմում:

ԱԺ նախագահի հայտարարությունը պատգամավորներն ընդունեցին ծափահարություններով։

ԱԺ փոխնախագահ Էդուարդ Շարմազանովը կատակեց. «Բոլորն ուրախ են, որ գնում ես»։
Բաբլոյանն էլ արձագանքեց. «Բոլորը հասկացան, որ ծափը վերաբերում էր հայտարարությանս առաջին կետին»։