Ձեր վստահելի աղբյուրը

Անմիջական, հուզիչ, ոգևորիչ ու դաստիարակչական. այսպիսին էր Ապրիլյան պատերազմի հերոսներ Հարություն Բադալյանի, Շուլի Հակոբյանի, Ռաֆայել Կրպեյանի ու Երևանի թիվ 78 դպրոցի աշակերտների հանդիպումը: Փետրվարի 16-ին Երևանի Հայրապետ Հայրապետյանի անվան թիվ 78 դպրոց տղաները հրավիրվել էին ներկա լինելու աշակերտների կողմից ապրիլյան պատերազմի հերոսներին նվիրված միջոցառմանը:

Աշակերտների բեմական ներկայացումից հետո հերոս տղաները պատմեցին իրենց մասին, պատասխանեցին աշակերտների ամենատարբեր հարցերին:

«Դժվար մենք այս երեխաների հետ փորձի փոխանակում անենք, սակայն տեսնելով, որ 11-12 տարեկան աշակերտներն արդեն իսկ այդքան խորությամբ տեղեկացված են ազգային հերոսների պատմությունից, պատերազմի ժամանակ իրականացված օպերացիաներից, նշանակում է, որ նրանք արդեն ազգի հայրենասեր զավակներ են մեծանում: Օդից ու ջրից հայրենասեր չեն լինում, հայրենասեր լինում են անկախ տարիքից ու անկախ սեռից: Մեր հրամանատարներից մեկն ասում էր՝ տանը երևի ձեզ մի շուն չէին վստահի պահել, իսկ այժմ դուք սահման եք պահում, կյանքն այդպիսի բան է, երեխեք ջան»,- ասաց Շուլի Հակոբյանը, ով այժմ սովորում է Պետհամալսարանի տնտեսագիտության ֆակուլտետում ու միաժամանակ աշխատում է պաշտպանության նախարարությունում: 

«Ծառայությունը կյանքում շատ բան է փոխում, ավելի հասուն, ավելի խելացի դառնալու հարցում, բայց ամենակարևորն է, որ դու ցանկանաս բանակից ինչ-որ բան ստանալ ապագայի համար»,-ասաց Հարություն Բադալյանը, ով ներկայումս սովորում է  Հայաստանի պետական տնտեսագիտական համալսարանի կառավարման ֆակուլտետում:

Ապրիլյան պատերազմի ժամանակ Թալիշում կռված ու թշնամու տանկերը խոցած Ռաֆայել Կրպեյանի խոսքերով, իրենք նույնպես փոքր ժամանակ ոգեշնչվել են մեր հերոսներով, նրանց պատմությունով: Ռաֆայել Կրպեյանի վրա մեծ ազդեցություն է ունեցել ՀՀ ազգային հերոս Թաթուլ Կրպեյանը, ում եղբոր որդին է նա: Ռաֆայելը ներկայումս սովորում է Կուլտուրայի և սպորտի ինստիտուտում:

Հարցին, թե ինչ էին մտածում պատերազմի ժամանակ գործելուց առաջ, տղաները նշեցին, որ այդ պահին դու մտածելու ժամանակ չունես, ուղղակի պետք է գործել, ետ ճանապարհ չկա: Տղաները նշեցին, որ վախը բոլորի մոտ էլ լինում է, սակայն չպետք է թույլ տալ, որ վախը քեզ հաղթի ու ուղղակի չպետք է վախենաս մահանալուց:

«Գործողությունների ժամանակ մտքերը խանգարում են: Մարտական գործողության ելքը վայրկյաններն են որոշում: Այդ պահին միակ միտքը պետք է լինի այն, որ ինչ էլ կատարվի դու դրանից դուրս ես գալու»,-ասաց Շուլին:

Իսկ թե ինչն էր ուժ տալիս նրանց պատերազմական գործողության ժամանակ առաջ շարժվելու համար հարցին՝ Հարություն Բադալյանն ասաց. «Դա միանգամից չի լինում, այն հայրենասիրական դաստիարակության արդյունք է նաև, որը ստանում ես վաղ տարիքից: Դու գիտես քո պատմությունը, գիտես, թե որքան արյուն է թափվել այդ հողի համար ու թե ինչու պետք է պաշտպանես քո հողը»:

Շուլի Հակոբյանն էլ շարունակելով նշեց, որ մեր զինվորը հակառակորդ երկրի զինվորից տարբերվում է նրանով, որ գիտակից է ու գիտի, թե ինչի համար է կռվում:

«Ճիշտ է, առիթ չի եղել, որ թուրքին կանգնեցնենք ու հարցնենք, թե դու ինչի ես կռվում, բայց նրանց գործողություններից երևում է, որ չգիտեն ինչի համար են կռվում: Եթե մեկն իր հայրենիքի համար պետք է փողով կռվի, ամեն ինչ պարզ է: Այդ պահին գիտակցությանը միանում է նաև վրեժխնդրությունը ու հասկանում ես, որ այդ հողերի համար մենք շատ թանկ ենք վճարել»,-ասաց Շուլի Հակոբյանը:

Աշակերտները քննարկեցին նաև պատերազմական գործողությունների մարտավարության հետ կապված հարցեր ու ստացան իրենց հետաքրքիր բոլոր հարցերի պատասխանները: Վերջում տղաներին նվիրեցին աշակերտների կողմից Ապրիլյան պատերազմի հերոսների մասին գրված շարադրություններից կազմված գրքույկները: