Ձեր վստահելի աղբյուրը

Նախագահ Սերժ Սարգսյանի ելույթը փետրվարի 16-18-ը կայացած Մյունխենի անվտանգության համաժողովում, ՌԴ Դաշնային խորհրդի միջազգային հարցերով հանձնաժողովի նախագահ Կոնստանտին Կոսաչովի համոզմամբ, անվտանգության հարցերին վերաբերող համաժողովի կարևոր ելույթներից էր, որն աչքի էր ընկնում կառուցողականությամբ և հավասարակշռվածությամբ: 

«Քննարկումը, որին մասնակցում էր Հայաստանի նախագահը, Մոլդովայի վարչապետը, ԵՄ ընդլայնման  և հարևանության հարցերով հանձնակատար Յոհաննես Հանը և ես, օրինակներից մեկն է նրա, որ Մյունխենի համաժողովի օրակարգը դառնում է ավելի  բազմակողմանի և սկսում է ներկայացնել տարբեր տեսակետներ, իսկ նման տենդենցը կարելի է պարզապես ողջունել: Ես իմ անկեղծ երախտագիտությունն եմ հայտնել Սերժ Սարգսյանին իր հրաշալի ելույթի համար, քանի որ նա իր կառուցողական ներդրումն ունեցավ քննարկմանը, հավասարակշռված և պատասխանատու վերլուծություն կատարեց այն մասին, թե ինչ է կատարվում հենց Հայաստանում և ընդհանրապես տարածաշրջանային  հարաբերություններում, ինչպես նաև ավելի գլոբալ  կոնտեքստում, որտեղ Հայաստանն անկասկած իր ուրույն դերն ունի: Առանց չափազանցության նրա ելույթը կենտրոնական էր և շատ մեծ ուշադրություն գրավեց»,- «Արմենպրես»-ի հետ զրույցում ասել է նա:

Կոնստանտին Կոսաչովի խոսքով՝ ներկաների ուշադրության կենտրոնում հենց Հայաստանի բազմավեկտոր քաղաքականությունն էր, այսինքն՝ այն փորձը, որով Հայաստանը համադրում է իր մասնակցությունը և՛ ԵԱՏՄ, և՛ ԵՄ ինտեգրացիոն գործընթացներին:

«Սա իսկապես դեռևս միակ և ունիկալ դեպքն է,- նշել է Կոնստանտին Կոսաչովը՝ մասնավորապես հիշեցնելով Ուկրաինայի փորձը:- Հայաստանի դեպքում նույնը չպատահեց, և այս համաձայնագիրը համապատասխանեցվեց Հայաստանի շահերին համագործակցության իր ամբողջ սպեկտրով՝ հաշվի առնելով նաև նրա պարտավորվածությունները ԵԱՏՄ-ում»: Ըստ Կոսաչովի՝ հենց սա այն օրինակն է, թե ինչպես կարելի է  գործել՝ գտնելով լուծում դժվար և թերևս բավականին  նուրբ հարցերում՝ նորմալ և կառուցողական ճանապարհով:

«Մենք 2012-2013 թվականներին  մինչև Ուկրաինայի ճգնաժամը  առաջարկեցինք Եվրամիությանը և Ուկրաինային կազմակերպել նման քննարկում ինչ-ինչ հակասություններից խուսափելու համար. այն ժամանակ Եվրամիությունը մեզ կոշտ պատասխան տվեց, որ դա քննարկման ենթակա չէ, դա այդ հարաբերությունների ներքին հարցն է, և բոլորս գիտենք՝ ինչի սա հանգեցրեց»,-ասել է ՌԴ պաշտոնյան՝ ընդգծելով, որ միայն կարելի է ողջունել, որ Հայաստանը տարբեր ինտեգրացիոն կառույցների հետ համագործակցության ճանապարհին ճիշտ քաղաքականություն է վարում: