Ձեր վստահելի աղբյուրը

Ապրիլյան պատերազմի հերոս, 2017 թվականի հունիսի 17-ին հակառակորդի գնդակից զոհված Նարեկ Գասպարյանն այսօր կդառնար 21 տարեկան:

Նարեկը հաղթեց պատերազմում, բայց թշնամու դավադիր գնդակը խոցեց նրան, կիսատ թողնելով նրա երազանքերն ու նպատակները:

Երևանի Նորք-Մարաշ վարչական շրջանում կազմակերպվել էր երթ՝ նվիրված զինվորի հիշատակին: 15 մետր երկարությամբ եռագույնը ձեռքներին՝ երթի մասնակիցները շարժվեցին դեպի Նորք Մարաշի  գերեզմանատուն, որտեղ հարազատները, ընկերները ծաղիկներ դրեցին նրա շիրմին:

«Ծնունդ շնորհավոր, Նարեկ: Դու միշտ մեզ հետ ես և մենք քեզ երբեք բացակա չենք դնելու: Տա աստված, որ դու վերջին զինվորը լինես, որի ծնունդն այսպես ենք շնորհավորում»,- ասաց «Զինվոր» համակարգող խորհրդի նախագահ Մարգարիտա Խաչատրյանը:

Հարազատները պատմում են, որ Նարեկը մեծ նվիրվածությամբ էր ծառայում, ապրիլյան պատերազմին աչքի է ընկել իր քաջությամբ, որի արդյունքում նաև պարգևատրվել է ՀՀ Նախագահի կողմից:

Եղբոր՝ Նվեր Գասպարյանի խոսքերով՝ իրենք այդպես էլ չիմացան, թե ինչ էր արել Նարեկը,  որի համար արժանացել էր խրախուսանքի:

«Նարեկը երբեք ծառայությունից ոչինչ չէր պատմում,  սահմանի լարվածության մասին նույնպես չէր խոսում: Ապրիլյան պատերազմի ժամանակ էլ ասում էր՝ մի մտածեք, մեր մոտ հանգիստ է, ոչինչ չկա, հետո ենք իմացել, որ նա եղել է ամենավտանգավոր դիրքերից մեկում, և պատահական չէ, որ ծառայության ընթացքում մի քանի խրախուսական արձակուրդներ է ստացել»,- Panorama.am-ի թղթակցի հետ զրույցում ասաց Նվերը:

Նարեկի  ծառայությանը  մնացել էր ընդամենը 26 օր. «Անհամբեր սպասում էինք նրա վերադարձին, օրերն էինք հաշվում, տուն էինք վերանորոգում, որ Նարեկին պատվով դիմավորեինք»։

Նարեկ Գասպարյանը սովորել է «Օլիմպոս» կրթահամալիրում, զուգահեռ՝ երաժշտական դպրոցում:

«Դհոլ էր նվագում: Ընկերները պատմում են, որ պոստում հաճախ էր համազգեստի վրա դհոլ նվագում: Մեծ երազանքներ ուներ եղբայրս, որոշել էր ծառայությունից հետո ուսումը շարունակեր, բայց…»,- ասում է Նարեկի մեծ եղբայրը:

Նշենք, որ այսօր նաև տեղի ունեցավ «Անմահ Նարեկ» երգի տեսահոլովակի պրեմիերան:

Հիշեցնենք, որ 2017 թվականի հունիսի 16-ին, հակառակորդը հաստոցավոր հակատանկային նռնականետերից խախտել է հրադադարի պահպանման ռեժիմը  ՊԲ կենտրոնական ենթակայության զորամասերից մեկի պահպանության տեղամասի ուղղությամբ, ինչի հետևանքով մահացու վիրավորումներ էին ստացել ՊԲ զինծառայողներ Արայիկ Ռուդիկի Մատինյանը (ծնված 1997թ.), Վիգեն Ժիրայրի Պետրոսյանը (ծնված 1997թ.) և Վարդան Ծովակի Սարգսյանը (ծնված 1997թ.): Հունիսի 17-ի  առավոտյան ևս ադրբեջանական կողմը հյուսիսային ուղղությամբ դիմել էր հերթական սադրանքի, որի հետևանքով ժամը 09.40-ի սահմաններում մահացու հրազենային վիրավորում էր ստացել ՊԲ զինծառայող, 1997թ. ծնված Նարեկ Տիգրանի Գասպարյանը: