Ձեր վստահելի աղբյուրը

Հայաստանում 2018 թվականին կներդրվի էլեկտրոնային աճուրդների  համակարգը։ Այս մասին այսօր լրագրողների հետ հանդիպման ժամանակ ասաց ՀՀ կառավարությանն առընթեր պետական գույքի կառավարման վարչության պետ Արման Սահակյանը:

«Այսինքն՝ 2019 թ-ից մենք կունենանք լիարժեք էլեկտրոնային աճուրդների մեխանիզմներ»,-նշեց նա։

Արման Սահակյանը հայտնեց, որ  պետական անշարժ գույքի հաշվառման գրանցամատյանում 2017 թվականին վերահաշվառվել է պետական սեփականություն հանդիսացող 8862 միավոր անշարժ գույք և պետական բաժնեմաս ունեցող ընկերությունների գույքի կազմում՝ 2705 միավոր անշարժ գույք: Ըստ նրա՝ 2018թ. հաշվառման փաստաթղթային համակարգից անցում կկատարվի էլեկտրոնային ինտեգրացված համակարգին: «Արդյունքում, բոլորը կարող են հետևել, թե ինչ անշարժ գույք կա հանրապետությունում։ Հաշվառման համակարգը հասանելի կլինի բոլոր շահագրգիռ մարմիններին և կունենա ավելի մեծ կիրառական նշանակություն»,- ընդգծեց նա:

Անդրադառնալով սոցիալական խնդիրներին՝ Արման Սահակյանը հայտնեց, որ շարունակվում է հանրակացարանների սեփականաշնորհումը։ Մասնավորապես, ըստ նրա, 2017թ. 249 քաղաքացիներ (90 ընտանիք) նվիրատվությամբ կամ սեփականաշնորհման ճանապարհով իրենց զբաղեցրած հանրակացարանային 91 սենյակների սեփականատեր են դարձել: Մինչդեռ  2016 թվականին 177 քաղաքացի է (68 ընտանիք) 70 սենյակի սեփականատեր  դարձել:

Վարչության պետը հայտնեց, որ ՀՀ նախագահի հանձնարարությամբ  փոփոխություններ են կատարվում իրավական ակտերում, որի նպատակն է պարզեցնել սեփականաշնորհման  գործընթացները։  «Այս փոփոխությունից հետո 509 ընտանիք կսեփականաշնորհի իր բնակարային տարածքը։ Կարծում եմ, որ մինչև տարեվերջ գրեթե ամբողջությամբ կավարտենք սեփականաշնորհման գործընթացը»,- ասաց Արման Սահակյանը։

Վարչության կողմից հսկողություն է իրականացվում 155 պայմանագրերով նախատեսված բազմաբնույթ պարտավորությունների նկատմամբ. ներդրումային և աշխատատեղերի ստեղծման, պրոֆիլի պահպանման, սոցիալական բնույթի գործարար ծրագրերի և այլ պարտավորություններ:

Անդրադառնալով ներդրումներին՝ պետգույքի վարչության պետն ասաց, որ նախորդ տարի 54 պայմանագրերով նախատեսված ներդրումային պարտավորությունների ընդհանուր գումարը կազմել է 89 մլն 315 հազար դոլար: 2017թ. կանխատեսումներից 2 մլն 463,3 հազար դոլարի ներդրումների կատարման ժամկետները փոփոխվել են ՀՀ կառավարության որոշման համաձայն:
Չկատարված ներդրումային պարտավորությունները, ըստ նրա, 2017 թվականին 2016 թվականի նկատմամբ նվազել են 86 %-ով:

Արման Սահակյանը հայտնեց, որ վարչության կողմից կնքված պայմանագրերի շրջանակում 2018 թվականին կանխատեսվում է շուրջ 17  մլն դոլարի ներդրում:

Պետգույքի վարչության պետը նաև հայտնեց, որ նախորդ տարի Վարչության կողմից ծավալուն աշխատանք է կատարվել դատարաններում պետության շահերը պաշտպանելու ուղղությամբ։ Արդյունքում, հարուցված հայցերի և բանակցությունների արդյունքում պետական բյուջե է վերադարձվել 59 մլն 316 հազ.դրամ:

«Պետական գույքի կառավարման բնագավառում բարեփոխումների գործընթացը շարունակվելու է նաև 2018 թվականի ընթացքում»,- նշեց նա։