Ձեր վստահելի աղբյուրը

Պետական գույքի կառավարման վարչության համար 2017 թվականը արդյունավետ տարի է եղել: Այս մասին այսօր լրագրողների հետ հանդիպման ժամանակ ասաց ՀՀ կառավարությանն առընթեր պետական գույքի կառավարման վարչության պետ Արման Սահակյանը:

Նրա խոսքով՝ պետական գույքի օտարումից մուտքերը 2017թ. կազմել են 685 մլն 746 հազ.դրամ, 2016 թվականի համեմատ՝ աճել է 4.7անգամ: Պետգույքի մասնավորեցումից մուտքերն էլ կազմել են 66 մլն 416 հազ.դրամ, ինչը 2016 թվականի համեմատ աճել է 5.5 %-ով:

Արման Սահակյանը հայտնեց նաև, որ պետական սեփականություն համարվող հողերի կադաստրային արժեքի վճարումից մուտքերը կազմել են 367 մլն 393 հազ.դրամ՝  2016-ի նկատմամբ աճելով 8.5 անգամ, իսկ պետգույքի վարձակալությունից մուտքերը  կազմել են 398 մլն 547 հազար դրամ, աճը 2016 թվականի նկատմամբ՝ շուրջ 8%:

Նշվեց նաև, որ շենքերի և շինությունների տանիքներին ու ձեղնահարկերում կապի սարքավորումների տեղակայման և սպասարկման ծառայությունից մուտքերը կազմել են 156 մլն 161 հազ.դրամ, աճը՝ մոտ 75%, ընկերությունների լուծարման գործընթացից դրամական միջոցները՝  372 մլն 25 հազ.դրամ (2016-ի համեմատ աճելով 3,1անգամ):

Այսպիսով, ըստ Արման Սահակյանի, ընդհանուր դրամական միջոցները 2017 թվականին կազմել են 2 մլրդ 46 մլն 287 հազ.դրամ՝ 2016 թվականի համեմատ աճելով 1.7 անգամ:

Վարչության պետը հայտնեց նաև, որ նախորդ տարի աճուրդների նախապատրաստման և կազմակերպման ուղղությամբ կատարվել են արմատական բարեփոխումներ, արդյունքում աննախադեպ աճել են պետական գույքի աճուրդային վաճառքի քանակական և որակական ցուցանիշները: Վաճառվող գույքի վերաբերյալ հանրային լայն իրազեկման, ինչպես նաև առանձնացված վայրում (Մերձավան) գույքի ցուցադրությունների կազմակերպման և գույքի վիճակի վերաբերյալ տեղեկատվության տրամադրման շնորհիվ 2016-2017 թվականներին վաճառվել է 704 միավոր տրանսպորտային միջոց՝ 164 մլն 165 հազ.դրամ ընդհանուր արժեքով:

«Մրցակցային դաշտի ապահովման շնորհիվ 2017թ. տրանսպորտային միջոցների վաճառքի միջին տոկոսը մեկնարկային գնի նկատմամբ կազմել է 117%, 2016 թվականին՝ 103%»,- ասաց Արման Սահակյանը։