Նուբարաշենի կոյուղագծերի խնդրին այժմ տրվող լուծումը ժամանակավոր է. Արդարադատության նախարար
Նուբարաշենում կոյուղագծերը վնասվել էին, բայց լուծումը պարզ չէր: Այս մասին այսօր լրագրողների հետ հանդիպմանը նշեց ՀՀ արդարադատության նախարար Դավիթ Հարությունյանը: Նրա խոսքով՝ այն լուծումը, որ հիմա է տրվում, ժամանակավոր է:
«Մենք նախորդ տարվանից ձեռնամուխ էինք եղել նախագծերի մշակմանը, այս տարի պետք է իրականացվեր պետական գնում: Պատասխանատու՞ է արդյոք պետական մարմինը տիրող իրավիճակի համար, բնականաբար, մենք պատասխանատու ենք ցանկացած թերության համար, և երբեք չենք խորշում պատասխանատվությունից, պատասխանատու ենք առողջապահության որակի, շենքային պայմանների համար և սրանով չենք սահմանափակվում»,- ասաց նա:
Հարությունյանը նշեց, որ պատասխանատվություն նշանակում է, որ ամեն օր կատարվում են քայլեր՝ լուծումներ գտնելու համար: Նախարարն ասաց, որ նախորդ տարի, օրինակ, քառակի ավելացրել են դատապարտյալներին տրամադրվող դեղամիջոցների գումարները, սա ռեսուրս է, և համարում են, որ այն պետք է ուղղել այդ խնդրին:
«Կոյուղաջրերն էլ են առաջնահերթ խնդիր, սա է պատճառը, որ մենք նախագիծ ենք պատվիրել, այս տարի պատրաստվում ենք իրականացնել գնում»,- ասաց նա:
Հարությունյանը նշեց, որ թեպետ կատարված քայլերով բնակիչների խնդիրը կլուծվի, բայց դա չի նշանակում, որ խնդիրը լուծվեց, գլոբալ խնդիրը սրանով չի լուծվում:
Նախարարը նաև խոսեց Երևանի Ավագանու այս տարվա առաջին նիստում գրանցված միջադեպի մասին, նշեց, որ կողմերն իրենց այդպես պետք է չպահեին: «Ես դատապարտում եմ ցանկացած ոչ բարեկիրթ, մեր մշակույթին անհարիր գործողություններ, որոնք, ցավոք սրտի, տվյալ պարագայում տեղի են ունեցել երկու կողմից»,- ասաց նա:
Լրագրողների հարցին՝ արդյո՞ք իր մեղքի բաժինը տեսնում է այս հարցում, որ նման միջադեպից հնարավոր կլիներ խուսափել, եթե ժամանակին լուծած լիներ հարցը, նա արձագանքեց՝ դա հարցի պրիմիտիվացում է:
Նախարարի խոսքով՝ այդ ձևով ցանկացած հարցին մոտենալու դեպքում՝ նշանակում է, որ, ենթադրենք, անձինք, ովքեր կատարում են անպարկեշտ արարքներ, ովքեր կարող են թույլ տալ կեղտաջրերով ներկայանալ ավագանու նիստին և այլն, ինչ-որ քայլ կատարելով՝ փոխելու՞ էին իրենց մտածելակերպը:
«Այն ինչ տեղի ունեցավ ավագանու նիստին անհարիր էր մեր մշակույթին: Ես կարծում եմ, որ երկու կողմերն էլ չպետք է այդպես իրենց պահեին»,-ասաց նա:
Լրահոս
Տեսանյութեր
Դուք մասնակից եք դարձել պետականության կործանմանը. Բագրատ Սրբազանը՝ ՔՊ-ականներին
