Ձեր վստահելի աղբյուրը

«Դիտարկումն անցել է ըստ նախատեսված ժամանակացույցի»: ԵԱՀԿ առաքելությունը հրադադարի ռեժիմի պլանային դիտարկումներից հետո մեծ մասամբ նման բովանդակությամբ հաղորդագրություն է տարածում Արցախի Հանրապետության ԱԳ նախարարությունը:

Ի՞նչ նպատակ ունեն դիտարկումները, դրանց արդյունքում ի՞նչ են արձանագրում, ի՞նչ քայլեր են ձեռնարկվում: Այս ու այլ հարցերի պատասխանները Panorama.am-ը ստացել է ԵԱՀԿ գլխավոր քարտուղարի անձնական ներկայացուցիչ Անջեյ Կասպրշիկի գրասենյակից:

Panorama.am-Ի՞նչ պարբերականությամբ են Ձեր դաշտային օգնականները դիտարկում անցկացնում Արցախի և Ադրբեջանի զինված ուժերի շփման գծում:
Պատասխան-ԵԱՀԿ գործող նախագահի անձնական ներկայացուցչի գրասենյակը պլանային դիտարկումներ է իրականացնում ամիսը մոտ երկու անգամ։

Panorama.am-Ի՞նչ նպատակ ունեն այդ դիտարկումները: Տարածված կարծիք կա, որ դրանք ձևական բնույթ ունեն:
Պատասխան-Դիտարկումները տեղում առկա իրավիճակի արձանագրումն են, և ԵԱՀԿ գործող նախագահի անձնական ներկայացուցչի գրասենյակին թույլ է տալիս տեղեկատվություն ստանալ կողմերից։ Դիտարկումների ժամանակ անձնակազմին զեկուցում են և քաղաքացիական, և զինվորական իշխանությունները։ Բացի այդ, տեղական հրամանատարների հետ քննարկվում են հետաքրքրություն ներկայացնող հարցեր և ստանում ենք ամփոփ տեղեկատվություն շփման գծում արձանագրված իրավիճակի մասին։ Դիտարկումները վստահության ամրապնդման միակ միջոցն են զինվորական ոլորտում, և  ԵԱՀԿ գործող նախագահի անձնական ներկայացուցչի գրասենյակն այն պարբերաբար անցկացրել է սկսած 1996 թ-ից։ Այն տրամադրում է տեղեկատվություն առաջին ձեռքից և արձանագրվում ԵԱՀԿ նախագահությանը, Մինսկի խմբի համանախագահներին, Մինսկի խմբին ուղղված զեկույցներում։

Panorama.am-Դիտարկումների ընթացքում ի՞նչ հանգամանքների վրա է հատկապես ուշադրություն դարձվում՝ բնակավայրերից զորամասերի, զենքի տեղակայման հեռավորությա՞ն, կողմերի զինված ուժերի շա՞րժի… Թվարկեք խնդրում եմ բոլորը:
Պատասխան-Կողմերն իրենց համար հետաքրքրություն ներկայացնող զինվորական և քաղաքացիական ոլորտներին առնչվող հարցեր են բարձրացնում։ Քաղաքացիական տեսակետից տեղական իշխանությունները խոսում են այն մասին, թե ինչպես է բնակչությունը տուժում է հակամարտության չլուծված լինելու պատճառով։ Կողմերի բարձրացրած բոլոր հարցերը զեկուցվում են ԵԱՀԿ նախագահությանն ու Մինսկի խմբի համանախագահներին։

Panorama.am-Մի քանի անգամ Արցախի Հանրապետության ԱԳՆ-ն տարածած հաղորդագրություններում նշել է, որ ադրբեջանական կողմը երաշխիքներ չի տվել ապահովելու ԵԱՀԿ առաքելության անդամների անվտանգությունը: Այդ դեպքերում ո՞րն է եղել Ձեր արձագանքը:
Պատասխան-ԵԱՀԿ գործող նախագահի անձնական ներկայացուցչի գրասենյակի դիտարկումները մանրակրկիտ կերպով նախապատրաստվում և համաձայնեցվում են կողմերի հետ։ Մասնակիցների անվտանգությունն ապահովելու, պահպանելու նպատակով դրանք անցկացվում են ռազմական ուղեկցորդների օգնությամբ։ Բացի այդ, անվտանգության երաշխիքները տրամադրվում են դիտարկումն անցկացնելու հարցման պաշտոնական պատասխանում, ինչպես նաև տեղական հրամանատարների կողմից հենց դիտարկման ընթացքում։ ԵԱՀԿ գործող նախագահի անձնական ներկայացուցչի գրասենյակի անձնակազմի անվտանգության ապահովումը երբևէ չի մերժվել կողմերի կողմից։

Panorama.am Պարբերաբար անցկացվող դիտարկումներն ի՞նչ են ցույց տվել, շփման գծի ո՞ր հատվածներն են առավել խնդրահարույց, կողմերից ո՞րն է առավել հաճախ խախտումներ թույլ տալիս:
Պատասխան-Տարբեր առիթներով շփման գծի բոլոր հատվածներում էլ արձանագրվել են զինադադարի խախտումներ և լարվածության աճ։

Panorama.am-Շնորհակալություն: