Ձեր վստահելի աղբյուրը

«Լսումների այս ձևաչափը լավ հնարավորություն  է ընձեռում Հայաստանի հանրային հետաքրքրություն ունեցող, նաև ցավոտ հարցերի ու խնդիրների շուրջ անկաշկանդ քննարկումների համար»,- Սումգայիթյան ջարդերի թեմայով կազմակերպված խորհրդարանական լսումների ժամանակ նման կարծիք հայտնեց ՀՀ արտաքին գործերի նախարարի տեղակալ Շավարշ Քոչարյանը։

Փոխնախարարը փաստեց, որ 30 տարվա ընթացքում Ադրբեջանի իշխանությունների գործելաոճը չի փոխվել։

«Մենք դրան ականատես եղանք 2013 թվականին, երբ հայ սպա Գուրգեն Մարգարյանին կացնահարելու համար դատապարտված Ռամիլ Սաֆարովն Ադրբեջան վերադառնալուն պես ազատ արձակվեց ու հերոսացվեց։  2016 թվականին ապրիլյան քառօրյա պատերազմի ընթացքում աշխարհը նորից ականատես եղավ հայերի հանդեպ ադրբեջանական հասարակության սերմանված ատելության քարանձավային դրսևորումներին՝ ուղղված թե խաղաղ բնակչության, թե ռազմագերիների դեմ։ Եվս մեկ անգամ Ադրբեջանն ապացուցեց, որ քաղաքակիրթ աշխարհի կանոնները և միջազգային իրավունքի, միջազգային հումանիտար և մարդու իրավունքների նորմերն այդ երկրի իշխանությունների համար դատարկ հնչյուններ են»,- ասաց նա։

Քոչարյանի խոսքով՝ Ադրբեջանի իշխանությունները հակադրվելով միջազգային հանրության և ԵԱՀԿ Մինսկի խմբի համանախագահ երկրների բազմաթիվ կոչերին՝ հասարակությունները խաղաղության պատրաստելու փոխարեն շարունակում են իրենց ռազմատենչ և առավելապաշտական քաղաքականությունը։

«Ադրբեջանի իշխանությունների՝ Արցախի ժողովրդի խաղաղ, ժողովրդավարական երկրում ազատ ապրելու օրինական պահանջին  ուժով և ուժի սպառնալիքով պատասխանելու քաղաքականությունն է պատճառը, որ Արցախի հակամարտությունը չի կարգավորվում։ Միջազգային մեր գործընկերների մոտ հասունացված է այն գիտակցությունը, որ քանի դեռ Ադրբեջանի իշխանությունները շարունակում են հայատացության քաղաքականությունը Հարավային Կովկասի տարածաշրջանում վտանգված են կայունությունը, խաղաղությունն ու անվտանգությունը»,- շեշտեց փոխարտգործնախարարը։

Նա հավելեց, որ երկրի ներսում և միջազգային հարթակներում հետևողական և նպատակային աշխատանքով ենք Ադրբեջանին պարտադրելու խաղաղություն, բացառելու նոր Սումգայիթների հնարավորությունը, հասնելու Արցախի հանրապետության միջազգային ճանաչմանը։