Ձեր վստահելի աղբյուրը

Արտավազդ Փելեշյանին վաղուց համարում են համաշխարահային կինոյի դասական, տարածական մոնտաժի նրա տեսությունն ուսումնասիրվում և ուսուցանվում է աշխարհի հայտնի կինոինստիտուտներում:

Նրա առաջին ֆիլմը «Սկիզբ»-ն էր, հետո հաջորդեցին «Մարդկանց երկիրը», «Մենք», «Մեր դարը», «Կյանք», «Տարվա եղանակները»...

«Իմ ֆիլմերը երկար կապրեն, որովհետև դրանք լի են սխալներով»,-մի առիթով ասել է նա:

Փելեշյանի բոլոր ֆիլմերը հավերժականի մասին են , ամեն ինչ՝ մարդու միջոցով, մարդու մասին։ Ռեժիսորը չի ընդունում այն կարծրատիպը, թե կինոն սինթետիկ արվեստ է, նրա համար կինոն միանգամայն ինքնուրույն աշխարհ է։ Մշակույթի նախարարությունից հիշեցնում են, որ 2017-ին Հայաստանում պետպատվերով լույս է տեսել  Արտավազդ Փելեշյանի «Իմ աշխարհը և դաշտի միասնական տեսությունը» գիրքը:

«Նրա ինչպես ֆիլմերը, այնպես էլ գրքերը ժամանակագրությունն են ոչ միայն իր արվեստի, այլև մեր ժողովրդի ապրած կյանքի»,-ասել է մշակույթի նախարար Արմեն Ամիրյանը:

ՀՀ մշակույթի նախարարությունը պատրաստվում է Վարպետի հետ շուտով պայմանագիր կնքել՝ նրա հուշերը 2020 թվականին պետական աջակցությամբ հրատարակելու համար։ Նախարարությունը պատրաստ է նաև աջակցել՝ Երվանդ Քոչարի մասին նրա ֆիլմը նկարահանելու գործում։

Փետրվարի 23-ին Ալեքսանդր Սպենդիարյանի անվան օպերայի և բալետի ազգային ակադեմիական թատրոնում տեղի կունենա մեծանուն կինոռեժիսոր, ՀՀ ժողովրդական արտիստ, ՀՀ արվեստի վաստակավոր գործիչ Արտավազդ Փելեշյանի ծննդյան 80-ամյակին նվիրված հոբելյանական երեկո:

Հանդես կգան Հայաստանի Օպերայի և բալետի թատրոնի սիմֆոնիկ նվագախումբը, մեներգիչները, երգչախումբը և բալետային արտիստները:

Հոբելյանական երեկոյի դիրիժորն է լինելու ՌԴ վաստակավոր արտիստ Կոնստանտին Օրբելյանը:

Համերգային երեկոյին մեծանուն կինոռեժիսորին իրենց ելույթներով կշնորհավորի նաև Հայաստանի ազգային ակադեմիական երգչախումբը՝ գեղարվեստական ղեկավար և դիրիժոր, ՀՀ ժող. արտիստ Հովհաննես Չեքիջյանի ղեկավարությամբ: Մուտքը  հրավիրատոմսերով է։