Ձեր վստահելի աղբյուրը

Գործադիրի այսօրվա նիստում հավանության է արժանացել  ՀՀ-ում 2018 թ. գարնանացան ցորենի, ոլոռի, սիսեռի, գարու, եգիպտացորենի, առվույտի և կորնգանի արտադրության զարգացման ծրագիրը:

Այսպիսով, անհարժեշտություն է առաջանում Սերմերի գործակալության նպատակային հաշիվներից օգտագործել 746,570,000 դրամ, որից 721,540,000 դրամը` մինչև 1977,5 տոննա առաջին վերարտադրության գարնանացան ցորենի, ոլոռի, սիսեռի, առաջին վերարտադրության գարնանացան գարու, եգիպտացորենի, առվույտի, կորնգանի, ինչպես նաև՝ մինչև 164 տոննա գարնանացան գարու առաջին վերարտադրության սերմացուներ ձեռքբերելու նպատակով, իսկ մինչև 25,000,000 դրամը` բեռնաթափման, բարձման, գործուղման և այլ ծախսերի համար:

Կառավարությունը հավանություն է տվել նաև պետական աջակցություն գյուղատնտեսական հողօգտագործողներին մատչելի գներով դիզելային վառելիքի ձեռքբերման ծրագրին: Ըստ հիմնավորման՝ դիզելային վառելիքի նկատմամբ 2018 թ. գյուղատնտեսական աշխատանքների համար պահանջարկը կազմում է մինչև 6,000,000 լիտր:

Ծրագիրը իրականացնելու համար ՀՀ գյուղատնտեսության նախարարությանը կհատկացվի մինչև 360,000,000 դրամ: Նախարարությունը որոշմամբ հատկացված գումարը, որպես սուբսիդիա, սահմանված կարգով, պայմանագրային հիմունքներով կտրամադրի իրականացրած մրցույթի արդյունքում հաղթող ճանաչված ընկերություններին՝ դիզվառելիքի մատակարարումները կազմակերպելու նպատակով: