Ձեր վստահելի աղբյուրը

Մարտի 1-2-ի իրադարձությունների  վերաբերյալ լսումների արդյունքում պարզվեց, որ քաղաքական մեծամասնության ու փոքրամասնության գնահատականներն ըստ էության չեն տարբերվում: Այսօր նման կարծիք հայտնեց «Ելք» խմբակցության անդամ Արտակ Զեյնալյանը:

«Այդ դեպքում ինչո՞ւ չընդունել ԱԺ հայտարարությունը, ընդունել ԱԺ-ի կողմից հղել այդ ուղերձը, հայտնել մեր սրտացավությունը որպես քաղաքական մարմին»,-ասաց պատգամավորը:
Նրա համոզմամբ, խնդրով միայն իրավապահները չէ, որ պետք է զբաղվեն:

«Լինելով իրավաբան, ես կարող եմ ինձ թույլ տալ դա ասել: Դասակարգին դավաճանելու կամ պաշտպանելու խնդիր չեմ ունենա, եթե ասեմ, որ արդարության ընկալումը ոչ միայն հատուկ է մարդուն, այլև կենդանուն: Հիմա եկեք գնահատենք այն, ինչ կատարվել է, արդա՞ր է, մեզ բավարարո՞ւմ է»,-ասաց նա:

Զեյնալյանը մարտի 1-ի տասը զոհերից 9-ի ներկայացուցիչն է հայաստանյան դատարաններում ու ՄԻԵԴ-ում, նաև քաղաքական ակտիվիստների կողմից  մոտ 50 դիմումներ է ներկայացրել Եվրոպական դատարան: Շուտով մի քանի վեճերի վերաբերյալ  կլինեն վճիռներ:

«Ես ինֆորմացիային տիրապետում եմ գրեթե այնքան,  որքան դատախազությունը, բայց գնահատականներն են տարբեր»,-ասաց պատգամավորը:

Տասը տարի առաջ տեղի ունեցածը Զեյնալյանն այսօր խորհրդարանի դահլիճում որակեց սցենարի իրականացում, որը սակայն խախտվել է. «Պետք է լինեին պետական մարմինների շենքերի գրավում, դրա դրդումը եղել է, Արամ Սարգսյանն է կանխել, պիտի լինեին նաև զոհված զինվորականներ, խանութներ պիտի թալանվեին, սակայն այդ խանութների կողքին կար նաև զենքի խանութ, որին մարդիկ մատոց չէին կպել: Մեր հասարակությունն այդ անկարգություններին սովոր չէ, հազարավորներով երթ է լինում, մի հատ մեքենայի ներկ մանրադրամով չի քերծվում»:

Մանրամասները՝ տեսանյութում: