Ձեր վստահելի աղբյուրը

Մադագասկարը, լինելով Ֆրանկոֆոնիայի միջազգային կազմակերպությունում նախագահող երկիր, այս տարի՝ երևանյան գագաթաժողովին ՖՄԿ-ում նախագահությունը կփոխանցի Հայաստանին: ԱԳՆ մամուլի ծառայության փոխանցմամբ՝ այս մասին նշել է Հայաստանի ԱԳ նախարար Էդվարդ Նալբանդյանն այսօր պաշտոնական այցով Հայաստանում գտնվող Մադագասկարի արտաքին գործերի նախարար Անրի Ռաբարի-Նձակայի հետ հանդիպմանը։

Մադագասկարի ԱԳ նախարարը ընդգծել է, որ Մադագասկարը շահագրգիռ է առաջ մղել և խորացնել Հայաստանի հետ համագործակցությունը երկկողմ և բազմակողմ ձևաչափերում: Անրի Ռաբարի-Նձական ասել է, որ երկու երկրները հանդիսանալով Ֆրանկոֆոնիայի միջազգային կազմակերպության անդամ՝ դավանում են ընդհանուր արժեքներ, որոնք հիմնված են մարդասիրության, եղբայրության, մարդու իրավունքների պաշտպանության և ժողովուրդների միջև փոխադարձ հարգանքի վրա:

Էդվարդ Նալբանդյանն ու Անրի Ռաբարի-Նձական քննարկել են Մադագասկարի նախագահի այս տարվա մայիսին Հայաստան նախատեսվող պետական այցին վերաբերող հարցեր՝ երկուստեք համոզմունք հայտնելով, որ այն կարող է նոր խթան հանդիսանալ տարբեր բնագավառներում երկկողմ կապերի ամրապնդման ու զարգացման համար:

Անդրադարձ է կատարվել Ֆրանկոֆոնիայի միջազգային կազմակերպության շրջանակում՝ փոխադարձ աջակցությամբ կազմակերպության գագաթաժողովը հյուրընկալելուն, և այդ համատեքստում նախարար Նալբանդյանը հույս է հայտնել, որ այդ դրական փորձը կշարունակվի ոչ միայն ֆրանկոֆոնիայի, այլև՝ միջազգային այլ կազմակերպությունների շրջանակներում:

Հայաստանի արտգործանախարարը Մադագասկարի գործընկերոջը ներկայացրել է այս տարի Ֆրանկոֆոնիայի միջազգային կազմակերպության երևանյան գագաթաժողովի նախապատրաստական աշխատանքները, գագաթաժողովի հավանությանը ներկայացվելիք փաստաթղթերի մշակման գործընթացը։