Ձեր վստահելի աղբյուրը

Հայաստանն ու Հնդկաստանը հուշագիր են ստորագրել, ըստ որի՝ հայ մասնագետները Հնդկաստանի դպրոցներում կներդնեն  «Արմաթ» լաբորատորիաներ: Հուշագիրը ստորագրվել է Հնդկաստանում փետրվարի 19-21-ը տեղի ունեցած Տեղեկատվական տեխնոլոգիաների համաշխարհային համաժողովի (WCIT) շրջանակներում:

Ինչպես այսօր լրագրողների հետ հանդիպման ժամանակ ասաց ԻՏՁՄ նախագահ Ալեքսանդր Եսայանը, հուշագրի ստորագրումը կարևոր նշանակություն ունի Հայաստանի համար: «Հնդկաստանի  ՏՏ ոլորտը աշխարհի ամենաարագ զարգացող ոլորտներից մեկն է: Եւ այն փաստը, որ նրանք մեծ  հետաքրքրությունն են ցուցաբերել հայկական «Արմաթ» լաբորատորիաների  նկատմամբ, դա մեզ ոգևորում է»,- ասաց նա՝ հավելելով, որ այս տարի պիլոտային ծրագիրը կսկսեն:

Առաջին փուլով  նախատեսվում է  Հնդկաստանի դպրոցներում  300 «Արմաթ» լաբորատորիաներ բացել, իսկ հետագայում դրանց թիվը կհասնի 3000-ի:  Այդ ընթացքում հայ  մասնագետներն ինժեներական լաբորատորիաները ղեկավարելու հմտությունները կփոխանցեն հնդիկներին:
Նա նաև հայտնեց, որ  ՏՏ համաշխարհային համաժողովում «Թումո» ընկերությանը հանձնվել է գլխավոր՝ Համաժողովի նախագահ Իվոն Չյուի կողմից տրվող մրցանակը «Թվային դարի խորհուրդը իրագործելու համար»։

Ալեքսանդր Եսայանը հայտնեց, որ 2019-ի  ՏՏ համաշխարհային կոնգրեսը  կանցկացվի  Հայաստանում: «Մենք պետք է լուրջ պատրաստվենք, որ քանի որ դա կարևոր միջոցառում է: Այդ համաժողովին մասնակցում են աշխարհի հանրահայտ ընկերությունների ղեկավարներ: Եթե նրանք գան Հայաստան, մենք հնարավորություն կունենանք նրանց ներկայացնելու մեր երկրի պոտենցիալը և ներդրումներ ներգրավելու Հայաստանում»,- ասաց ԻՏՁՄ նախագահը:

ԻՏՁՄ գործադիր տնօրեն Կարեն Վարդանյանն էլ ասաց, որ Ալեքսանդր Եսայանը Տեղեկատվական տեխնոլոգիաների և ծառայությունների համաշխարհային ալյանսի (World Information Technology and Services Alliance-WITSA) կողմից ընտրվել է որպես WITSA տնօրենների խորհրդի անդամ, ինչը կարևոր մեսիջ էր ՏՏ համաշխարհային համայնքին:

Կարեն Վարդանյանը հայտնեց, որ 2004թ-ին Հայաստանը դարձել է այդ կազմակերպության անդամ, իսկ 2005թ. երազել են, թե երբ են այն Հայաստան բերելու:

«Միշտ զգացել ենք, որ պատրաստ չենք, մեզ թերագնահատել ենք, բայց 3-4 տարի առաջ դիմեցինք, և ստացանք համաժողովը Երևանում անցկացնելու իրավունք:  Միջոցառումն իր մասնակիցների և ծավալի առումով Հայաստանում ոչ մի նախադեպ չի ունեցել: Պատկերացրեք՝ 2500 խոշոր ընկերությունների տնօրեններ, համալսարանների ղեկավարներ, այդ ամենի տեղակայման, ճիշտ օրակարգի, տեղափոխման կազմակերպումը, մեզ լուրջ ուսումնասիրություն էր պետք, դրա համար մասնակցում էինք տարբեր երկրներում կազմակերպվող համաժողովներին: Հիմա մեր թիմի ընդհանուր եզրակացությունն այն է, որ կարող ենք լավագույն կոնգրեսը կազմակերպել։  Խոշոր երկրները մեծ ներքին ռեսուրս ունեն, մենք չունենք այդ ռեսուրսը, ուստի ամբողջ աշխարհին հավասարաչափ կներգրավենք և դա ավելի ձգող կլինի»,- նշեց Կարեն Վարդանյանը։