Արմեն Սարգսյանը Հայաստանում չի ապրել, հայ մարդու դարդուցավով չի ապրել. Արթուր Բաղդասարյան
ՕԵԿ նախագահ Արթուր Բաղդասարյանը, որպես գրագետ, բարեկիրթ մարդու, լավ է վերաբերում ՀՀԿ-ի կողմից նախագահի թեկնածու առաջադրված Արմեն Սարգսյանին, սակայն մտահոգ է, որ նա վերջին 10-15 տարիներին Հայաստանի ներքին անցուցարձին ծանոթ չի եղել։ Այս մասին նա ասաց լրագրողների հետ զրույցում։
«Արմեն Սարգսյանը Հայաստանում չի ապրել, հայ մարդու դարդուցավով չի ապրել։ Լոնդոնյան կյանքը տարբերվում է հայաստանյան իրականությունից։ Ես ծանոթ եմ նրա հետ, նրան գիտեմ որպես բարեկիրթ, կրթված, փորձառու անհատականություն։ Հաջողություն իրեն»,- ասաց Բաղդասարյանը։
Անդրադառնալով փաստին, որ Արմեն Սարգսյանն այդպես էլ չհանդիպեց իրենց հետ՝ որպես արտախորհրդարանական քաղաքական ուժի, ՕԵԿ նախագահը նկատեց, որ հանդիպումը երկուստեք չի կայացել տեխնիկական խնդիրների պատճառով։ «Ամբիցիայի հարց չկար»,- ասաց նա։
Ինչ վերաբերում է ՀՀ չորրորդ նախագահի սահմանափակ լիազորություններին՝ Արթուր Բաղդասարյանը համաձայնեց, որ կառավարման նոր համակարգով իշխանությունը կենտրոնանում է վարչապետի ձեռքում։ «Նոր նախագահից ավելի շատ բարոյական ակնկալիքներ կարող ենք ունենալ։ Իհարկե, ֆորմալ առումով որոշակի լիազորություններ նա ունի, բայց չեմ կարծում, որ գործող Սահմանադրությամբ նախագահը էական դերակատարում կարող է ունենալ»,- նշեց նա։
Հարցին՝ իր կարծիքով ո՚՞ր տարբերակն է ճիշտ՝ նոր նախագահին ընտրել ԱԺ-ում, թե կազմակերպել համաժողովրդական ընտրություններ, Արթուր Բաղդասարյանը պատասխանեց, որ թեև ինքը համաժողովրդական ընտրություններ կազմակերպելու կողմնակիցն է, սակայն պարզ է, որ գնացքն արդեն գնացել է, ընտրությանը հաշված օրեր են մնացել։ Այսօր ունենք այն, ինչ ունենք և չեմ կարծում, որ հնարավոր է ինչ-որ բան փոխել։
Իսկ գործող խորհրդարանը լեգիտիմ համարո՞ւմ է, հետաքրքրվեցին լրագրղները։ Բաղդասարյանն ի պատասխան շեշտեց, որ խորհրդարանի ձևավորման ժամանակ տեղի է ունեցել գործարք՝ հասարակության մեծ մասի և հաղթած ուժի միջև։ «Գործարքը պարտադրանքով տեղի չի ունեցել, դրա համար էլ հասարակությունն այս գործարքի արդյունքում իր վրա զգում է վնասները»,- ասաց նա։
Լրագրողները Արթուր Բաղդասարյանից նաև հետաքրքրվեցին՝ ապրիլին ում է տեսնում վարչապետի պաշտոնում։ Նա նշեց, որ տեսնում է նրան, ում կառաջարկի իշխող քաղաքական ուժը: «Իմ և ձեր տեսնելով չի: Ես կողմնակից եմ, որ Հայաստանում չլինի ստվերային դերակատում, Սերժ Սագսյանին են առաջարկել, թող առաջարկեն։ Ինքը, լինելով վարչապետ, իր իշխանության ծավալով պայմանավորված, կկրի համարեժք իրավական և քաղաքական պատասխանատվություն՝ իր գլխավորած կառավարության գործունեության համար: Ես, որպես քաղաքական գործիչ, բաց գործընթացներին կողմնակից եմ, ոչ թե լինի օրինակ՝ Սիմոն Սիմոնյանը, բայց ղեկավարի Աշոտ Աշոտյանը»,-ասաց նա և շեշտեց, որ դա ՀՀԿ-ի որոշումն է:
Լրահոս
Տեսանյութեր
Թալանում ու թալանում են , խաբելով, ստով ո՞ւմ փորն է կշտանում. Քաղաքացիները՝ թանկացումների մասին
