Ձեր վստահելի աղբյուրը

Իշխանությունը որևէ խնդիր չի տեսնում Ազգային ժողովում քննարկելու մարտի 1-ի հարցը: ԱԺ-ում լրագրողների հետ ճեպազրույցում այս մասին ասաց ԱԺ պատգամավոր Սամվել Նիկոյանը՝ անդրադառնալով ՀՀԿ-ի՝ «2008 թվականի Մարտի 1-ի, 2-ի իրադարձությունների մասին» ԱԺ հայտարարության նախագիծը ԱԺ նիստերի օրակարգ ընդգրկելու հարցին միաձայն կողմ քվեարկելուն:

Հարցին՝ հնարավո՞ր է, որ հարցն օրակարգ բերելն ուղերձ է ՀՀ երկրորդ նախագահ Ռոբերտ Քոչարյանին՝ ապրիլյան գործընթացներին ընդառաջ չակտիվանալ, պատգամավորը պատասխանեց.
«Տասը տարի առաջ եզրակացության մեջ, ինչ ես ասում եմ, գրված էր: Ինչ ես խոսել եմ, տասը տարի առաջ գրված է եղել: Ես հանձնաժողովի նախագահ էի: Ես այդ հարցը հրապարակային տասը տարի առաջ հնչեցրել եմ՝ ակնկալելով, որ հարցին հրապարակային պատասխան կլինի»:

Հարջորդ հարցին՝ իր հարցադրումներից չի՞ հետևում, որ պետությունը Ռոբերտ Քոչարյանի դեմքով հանցագործություն է կատարել, Նիկոյանը պատասխանեց. «Բացարձակապես ոչ»:

Իսկ ՀՀ նախագահ Սերժ Սարգսյանը մարտի 1-ի գործի շրջանակներում հարցաքննվելո՞ւ է, հետաքրքրվեցին լրագրողները: ՀՀԿ խմբակցությա պատգամավորը հորդորեց հարցն ուղղել հարցաքննող մարմնին:

Սամվել Նիկոյանը համոզմունք հայտնեց՝ ընդդիմության մի մասը ցանկանում է, որ մարտի 1-ը բացահայտվի, մինչդեռ ընդդիմության որոշում կայացնող  հատվածը դա չի ցանկանում: «Նրանք դեռևս այն ժամանակ հույս ունեին, որ ժողովրդի և միջազգային կառույցների ճնշումների ներքո կարող էին իշխանափոսխություն իրականացնել»,- ասաց Նիկոյանը:

Հարցին՝ «Ելք» խմբակցության ներկայիս լիդերներն իր նշած ո՞ր հատվածում են, պատգամավորը պատասխանեց՝ երկրորդ հատվածում:

Իսկ ինչո՞ւ ՀՀԿ խմբակցությունը ռեյթինգային ընտրակարգի չեղարկման վերաբերյալ նախագծին ևս կողմ չքվեարկեց, հետաքրքրվեցին լրագրողները: «Շատ պարզ պատճառով: Դա չի նշանակում, որ ով ինչ առաջարկեց, պետք է համաձայնենք: Ռեյթինգային համակարգը համամասնական է և նախորդ ընտրությունների ժամանակ ցույց տվեց, որ այդ համակարգը գործեց լավագույն ձևով: Կա՞ն խնդիրներ՝ կապված այդ օրենքի կատարման հետ, ուրեմն պետք է այդ ուղղությամբ աշխատենք: Բայց ամեն անգամ ընտրությունենրց հետո ընտրակարգը փոխել, չգիտես՝ ինչ կստացվի»,- ասաց պատգամավորը:

Նիկոյանի խոսքվ, ՀՀ ազգային ժողովը միապալատ մարմին է, և պետք է համամասնական ընտրակարգով ստեղծել մեխանիզմներ, որպեսզի մարզերը խորհրդարանում ներկայացված լինեն, ոչ թե «երևանյան պառլամենտ» լինի: