Ձեր վստահելի աղբյուրը

«Գևորգ Կոստանյանի թեկնածությունն այս պաշտոնին առավել քան համապատասխան է»,- խորհրդարանում այս մասին հայտարարեց ԱԺ պատգամավոր Կարեն Բերքարյանը՝ գործընկերներին կոչ անելով քվեարկել և նրան մաղթել մեծամեծ հաջողություններ։

Հիշեցնենք, որ ԱԺ պետական-իրավական և մարդու իրավունքների հարցերի մշտական հանձնաժողովի նախագահի թափուր պաշտոնում Հանրապետական խմբակցությունն առաջադրել է Գևորգ Կոստանյանի թեկնածությունը։

Բեքարյանը շնորհակալություն հայտնեց հանձնաժողովի նախկին նախագահ Հրայր Թովմասյանին՝ արած աշխատանքի ու անցած ճանապարհի համար։

ՀՀԿ-ական պատգամավոր Խոսրով Հարությունի խոսքով՝ Կոստանյանի համաձայնությունն այս պաշտոնում առաջադրվելու, խոսում է նրա պատասխանատվության մասին։

«Այն կարծիքին եմ, որ այդ պատասխանատվությունը պատվով իրականացնելու կարողություններն ունեք։ Համոզված եմ, որ Ձեզ մոտ ստացվելու է»,- ասաց պատգամավորը։

Գործընկերների խոսքերից հետո ելույթ ունեցավ Գևորգ Կոստանյանը։

«Չափազանց զգացված եմ։ Նաև զարմացած եմ, որ իմ վերաբերյալ նման բնութագրական գնահատականներ տրվեցին, դրանք ինձ համար էլ էին նորություն։ Եթե հիմա ինձ ասեին բնութագրի քեզ, առնվազն 70 տոկոսը կասեի այդ ամեն ինչի։ Բայց միաժամանակ ուզում եմ ասել, որ համաձայն եմ մի բանի հետ, ցանկացած գնահատական, որ տրվում է, չի դրվում կատարված աշխատանքի համար, դրվում է կատարվելիք աշխատանքի վրա, դրանք պարտավորեցնող են»,- ասաց թեկնածուն։

Նա հավելեց, որ ամեն ինչ կանի, որ տարիներ հետո էլ իր մասին մնան այն կարծիքին, որով որ իրեն բնութագրեցին։

ԱԺ պետական-իրավական և մարդու իրավունքների հարցերի մշտական հանձնաժողովի նախագահի ընտրությունը կանցկացվի վաղը՝ ժամը 13-14-ը։