Այսպիսի գնահատականները չեն կարող բնորոշ լինել ինձ. Գևորգ Դանիելյան
«Հայաստանի իրավասու մարմինների կողմից ընդունված նորմատիվ իրավական ակտերից ՍԴ-ն մի քանի հարյուր դրույթ ճանաչել է Սահմանադրությանը հակասող և անվավեր։ Դատարանների կողմից 25 տարվա ընթացքում չի եղել դեպք, որ որևէ դրույթ ենթաօրենսդրական ակտի, գերատեսչական նորմատիվ իրավական ակտի, ճանաչվի օրենքին հակասող և անվավեր»,- այսօր խորհրդարանում այս մասին նշեց «Ելք» խմբակցության պատգամավոր Արտակ Զեյնալյանը՝ դիմելով Բարձրագույն դատական խորհրդի երկրորդ պաշտոնում առաջադրված թեկնածու Գևորգ Դանիելյանին։
Զեյնալյանի խոսքով՝ Եվրոպական դատարանը վերջին շրջանում հետևողականորեն հաստատում է, որ Հայաստանում կալանքը կիրառվում է մեխանիկորեն, հիշատակվում է իրավադրույթը, փաստակազմը՝ առանց տակը դնելու փաստական հիմքեր։
«Ինչ եք կարծում, ինչպե՞ս կարելի է հաղթահարել սա, որ դատարանները քննեն և օրենքին հակասող ճանաչեն նորմերը կամ կալանքը կիրառեն այնպես, ինչպես որ եվրոպական դատարանը հետևողականորեն արձանագրում է, որ չի կիրառվում»,- հարցրեց պատգամավորը։
Ի պատասխան Գևորգ Դանիելյանը նշեց, որ ՍԴ անդամների հետ իրենք կատարել են լրջագույն վերլուծություն և դրա արդյունքում առավել հստակեցրել են որոշումների այն շրջանակը, որոնք որպես կանոն կամ չեն կատարվում, կամ կատարվում են մասամբ։
«Շատ հաճախ իրավիճակը պարզաբանվում է օրենսդրության անկատարությամբ։ Իմ դիրքորոշումը մի փոքր այլ է այն կտրվածքով, որ եթե մենք վավերացնում ենք միջազգային պայմանագրեր և դրանք այս կամ այն չափով հակասության մեջ են ազգային օրենսդրության հետ, ապա այստեղ ամեն անգամ հղում անել ազգային օրենսդրությանը ուղղակի տեղին չէ։ Այսօրվա զարգացումներն այնպիսին են, որ եթե դատավորը կարողանում է հիմնավորել իր դիրքորոշումը, մենք այստեղ կարող ենք նույնիսկ դատարանի կարգապահական պատասխանատվության հարց չբարձրացնել, բայց երբ դատարանը պարզապես մեխանիկորեն ղեկավարվում է ազգային օրենսդրությամբ և զերծ է մնում հիմնավորումներից, այստեղ մենք կարող ենք իսկապես տեսնել խնդիր և քննարկել կարգապահական պատասխանատվության հարցը»։
Թեկնածուին հարց ուղղեց նաև «Ելք» խմբակցության պատգամավոր Արարատ Միրզոյանը՝ ասելով. «Արմեն Ռուստամյանը եղել է քաղբանտարկյալ թե հանցագործ, որին համապատասխան հոդվածով դատել են»։
Գևորգ Դանիելյանը պատասխանեց. «Ցանկացած անձի վերաբերյալ սպառիչ գնահատական տալու համար դրա պատասխանը կլինի դիլետանտություն, եթե դուք պարզապես ինչ-ինչ նյութերի հիման վրա, այդ թվում նաև մամուլից վերցրած, փորձում եք գնահատական տալ և սպառիչ հայտարարել, որ այս անձի նկատմամբ հետապնդումը եղել է քաղաքական, կամ ոչ այնքան քաղաքական, այսպիսի գնահատականները չեն կարող բնորոշ լինել ինձ` տվյալ դեպքում իրավաբանի»։
Լրահոս
Տեսանյութեր
ՈւՂԻՂ. Տրանսպորտը թանկացնում են նախկինների մերժած հաշվարկով. Պիպոյանը փաստաթղթեր է հրապարակում
