Ձեր վստահելի աղբյուրը

Հայաստանյան շուկայում խաղալիքների անվտանգությունն այսօր ամենասուր և կարևոր խնդիրներից մեկն է, և այն  ՇՎՏՄ-ում ՀԿ-ների հետ քննարկման հիմնական հարցն է դարձել։ 

Տնտեսական զարգացման և ներդումների նախարարության շուկայի վերահսկողության տեսչական մարմինը (ՇՎՏՄ) հանդիպման էր հրավիրել ոլորտում ակտիվորեն աշխատող հասարակական կազմակերպությունների ներկայացուցիչներին՝ 2018-ի համագործակցության եզրերը հստակեցնելու համար։

Տեսչական մարմինի իրազեկման, խորհրդատվության և հանրության հետ տարվող
աշխատանքների բաժնից հայտնում են, որ ՀԿ-ներին նախ ներկայացվել են ՏՄ-ի այս տարվա գործունեության, ստուգումների և հանրային իրազեկման աշխատանքների ծրագրերը։ Քննարկման առանցքային հարց դարձած խաղալիքների անվտանգության առումով նշվել է, որ 2018-ին նախատեսվում է ստուգել 47 ընկերություն։

2017-ին ՇՎՏՄ-ի իրականացրած ստուգումները փաստում են, որ ոլորտում լուրջ բաց կա, ստուգված տնտեսվարողների մեծ մասը տուգանվել է խախտումների համար։

Ոլորտի առավել ռիսկայության մասին է վկայում նաև 2017-ին  ՀՀ տարածք խաղալիքների ներմուծումների վերաբերյալ տվյալների վերլուծությունը, ըստ որի՝ նման արտադրանք ներմուծած տնտեսվարող 76 սուբյեկտներից համապատասխանության սերտիֆիկատ է ստացել ընդամենը 14-ը կամ 18,4 տոկոսը։

Ուստի ՀԿ-ների հետ պայմանավորվածություն է ձեռք բերվել  համագործակցության հիմնական ուղղություններից մեկը սահմանել խաղալիքների անվտանգությունը և այս ուղղությամբ համատեղ քայլեր ձեռնարկել։ ՀԿ-ների ներկայացուցիները նշել են, որ իրենց ուշադրության կենտրոնում են պահելու խաղալիքների սերտիֆիկացման գործընթացը ևս։