Ձեր վստահելի աղբյուրը

Ազգային ժողովում քնննարկվում է Սումգայիթյան ոճրագործության 30-րդ տարելիցի կապակցությամբ ԱԺ հայտարարության նախագիծը, որի հեղինակներն են պատգամավորներ Վահրամ Բաղդասարյանը, Արմեն Աշոտյանը, Վահե Էնֆիաջյանը, Արմեն Ռուստամյանը, «Հայաստանի Հանրապետական կուսակցություն», «Ծառուկյան», «Հայ Յեղափոխական Դաշնակցություն» և «Ելք» խմբակցությունները։

Հայտարարությունը ներկայացրեց ՀՀԿ խմբակցության պատգամավոր Արմեն Աշոտյանը՝ նշելով, որ սա այն կարևոր հարցերից է, որտեղ բոլոր քաղաքական տարաձայնությունները մղվում են երկրորդ պլան և գալիս է ընդհանուր պետական շահ հետապնդելու հրամայականը։

Ընթերցելով հայտարարության տեքստը՝ զեկուցողը հայտարարեց. «Հայաստանի Հանրապետության Ազգային ժողովը դատապարտում է խաղաղ բնակչության դեմ Ադրբեջանի իրագործած զանգվածային բռնությունները, սպանություններն ու տեղահանումները, ինչպես նաև հայատյաց, ռասիստական քաղաքականությունը և Լեռնային Ղարաբաղի դեմ սանձազերծված ագրեսիվ ռազմական գործողությունները:

Ոգեկոչում է անմեղ զոհերի հիշատակը, կոչ է անում խորհրդարաններին և խորհրդարանական վեհաժողովներին, միջազգային կազմակերպություններին, մարդու իրավունքների պաշտպանությամբ զբաղվող կառույցներին` դատապարտել խաղաղ բնակչության նկատմամբ Ադրբեջանի իրականացրած և շարունակվող ոճրագործությունները, միջազգային մարդասիրական իրավունքի խախտումները, որոնք սպառնալիք են ոչ միայն հայ ժողովրդի, այլև ողջ տարածաշրջանի անվտանգության, կայունության և զարգացման համար»:

Նա հայտնեց, որ հայտարարությունն ընդունվելուց հետո անմիջապես թարգմանվելու է օտար լեզուներով և սփռվելու է միջազգային գործընկերներին։

Հայտարարության տեքստն ամբողջությամբ՝ տեսանյութում։