Ձեր վստահելի աղբյուրը

Բոլոր խմբակցությունների պատգամավորները հանձնաժողովի կազմում ներառված են և առնվազն կոռեկտ չէ, երբ հարցականի տակ ես դնում ստորագրությունը: Այսօր լրագրողների հետ զրույցում նման տեսակետ հայտնեց ԱԺ փոխնախագահ Էդուարդ Շարմազանովը՝ անդրադանալով ԲԴԽ թեկնածուների ընտրությունից հետո ծագած տարաձայնություններին:

Նրա խոսքով, եթե «Ելք» խմբակցության ղեկավարն ավելի շատ վստահում է լրատվամիջոցներին, քան իր խմբակցության գործընկերներին, դա իր խնդիրն է։

«Ես այստեղ ասելու բան չունեմ, ուրեմն լուրջ ճգնաժամի առջև են կանգնած», -ասաց Շարմազանովը։

Դիտարկմանը, թե «Ելք»-ը պնդում է, որ իրենց ձայները դիտմամբ են կեղծվել՝ իրենց շարքերում կռիվ հրահրելու համար, ԱԺ փոխնախագահը նկատեց. «Ես էլ կարող եմ շատ բան ասել»։

Շարմազանովը նաև ընդգծեց, որ Նիկոլ Փաշինյանը հանձնաժողովի անդամ չի և չի կարող ասել՝ ինչպես է ամեն ինչ եղել։ «Չի կարելի պատգամավորներին վիրավորել։ Արձանագրությունը նրա համար է, որպեսզի պատգամավորները ստորագրեն ու ցույց տան, որ ամեն ինչ նորմալ է։ Հաշվիչ հանձնաժողովի բոլոր պատգամավորներն առանց բացառության ստորագրել են, ու պետք չի քո կուսակցության կամ դիմացինի անդամին վատ դրության մեջ դնել», - ասաց պատգամավորը: