Ձեր վստահելի աղբյուրը

«Թեղուտի ներդրումային ծրագիրն ամբողջությամբ իրականացվում է,  ընթացքի մեջ է»,-ԱԺ-ում հայտարարեց Հ տնտեսական զարգացման և ներդրումների նախարար Սուրեն Կարայանը՝ արձագանքելով «Ելք» խմբակցության պատգամավոր Մանե Թանդիլյանի մտահոգություններին:

 Պատգամավորը մասնավորապես նշեց, որ ներդրումային ծրագիրն իրականացնող ընկերությունը խնդիրներ ունի վարկային պարտավորությունների կատարման հետ, Հայաստանը երաշխավո՞ր է, ծրագրի հնարավոր ձախողման դեպքում, դա ինչ հետևանքներ կունենա, կա՞ն ներդրումային այլ ծրագրեր, որոնք վտանգի տակ են:

Նախարարն ի պատասխան ասաց, ներկայում այնտեղ իրականացվում են պոչամբարի ուսումնասիրություններ, երկու միջազգային ընկերություններ այդ աշխատանքի արդյունքում կասեն, թե լրացուցիչ ինչ աշխատանքներ պետք է իրականացվեն, որպեսզի այդ պրոեկտը բնապահպանական առումով անվտանգ իրականացվի:

«Եզրակացությունից հետո հնարավոր է որոշ ժամանակով վերազինման աշխատանքներ լինեն: Ուզում եմ հստակորեն նշել, որ պետության կողմից որևէ երաշխիք՝ ոչ գրավոր, ոչ էլ բանավոր, չի տրամադրվել այդ պրոեկտի ֆինանսավորման մասով, այդ պրոեկտն իր գործունեությունը կշարունակի վերազինումից հետո»,-ասաց գործադիրի անդամը:

Կարայանը հավատացրեց, որ ծրագրի իրականացման հետ կապված որևէ խնդիր չկա: