Պոլսահայ գործիչը Աթեշյանի պահանջով հրաժարական է տվել

Հասարակություն 13:00 01/03/2018

Պոլսահայ գործիչը Աթեշյանի պահանջով հրաժարական է տվել

Պոլսի Գեդիկփաշայի հայկական Սուրբ Հովհաննես եկեղեցու հիմնադրամի ղեկավար Հարություն Շանլըն հրաժարական է տվել: «Էրմենիհաբեր»-ի փոխանցմամբ, այս մասին հայտնել է պոլսահայ համայնքային գործիչներից Կարո Գաբրիելյանը: Նա հրապարակել է Շանլըի հրաժարականի դիմումը, ինչպես նաև դիմումին հաջորդած պատրիարքության արձագանքը:

Հրաժարականի դիմումի մեջ Շանլըն հայտնել է, որ հիմնադրամի նախագահի պաշտոնը թողնում է Պոլսի հայոց պատրիարքի փոխանորդ Արամ արքեպիսկոպոս Աթեշյանի պահանջով:

Շանլըն նշել է, որ Աթեշյանն առանց հիմնավորման Սուրբ Հովհաննես եկեղեցուց հեռացրել էր քահանային, իսկ երբ եկեղեցու խորհուրդը դիմել էր պատրիարքարան քահանային վերանշանակելու համար, Աթեշյանը տեղեկացրել էր, որ քահանան Սուրբ Հովհաննեսում նորից կստանձնի իր պարտականությունները, եթե հիմնադրամի նախագահը հրաժարական տա.

«Որպեսզի մեր եկեղեցում երկար տարիներ ծառայություն մատուցած հոգևորականն իմ պատճառով անարդարության զոհ չդառնա, մեր եկեղեցին ու հիմնադրամը պատրիարքի փոխանորդ Արամ Աթեշյանի կողմից անիրավության չենթարկվի, ինչպես նաև հայ համայնքում իմ անձի պատճառով խռովություն և քաոս չառաջանա, հրաժարվում եմ հիմնադրամի գործադիր խորհրդի նախագահի պաշտոնից և խորհրդի անդամակցությունից»:

Կարո Գաբրիելյանի հրապարակած մյուս նամակը, մակագրված պատրիարքարանի լուսարարապետ Թաթուլ ծայրագույն վարդապետ Անուշյանի կողմից, ուղղված է Գետիկփաշայի Սուրբ Հովհաննես եկեղեցու խորհրդին: Նամակում հաղորդվում է, որ նախորդ՝ փետրվարի 22-ի պաշտոնագիրն անվավեր է, և տեր Զավեն քահանա Բչաքչյանը մարտի 1-ից կվերահաստատվի իր պաշտոնում և կշարունակի ծառայությունը Սուրբ Հովհաննես եկեղեցում:

Ստորև ներկայացված են Հարություն Շանլըի հրաժարականի դիմումը և պատրիարքարանի լուսարարապետի նամակը:

Հարակից հրապարակումներ`

Տեքստում սխալ կամ վրիպակ նկատելու դեպքում, ուղարկեք խմբագրին հաղորդագրություն` նշելով տվյալ սխալը, այնուհետև սեղմելով Ctrl-Enter: