Ձեր վստահելի աղբյուրը

Հայկական կողմից որևէ պայմանավորվածություն չի դրժվել: Թուրքիան է խուսափել իր պարտավորություններից և նախապայմաններ դրել ՀՀ առջև: ԱԺ-ում լրագրողների հետ զրույցում այս մասին ասաց ՀՀԿ խմբակցության ղեկավար Վահրամ Բաղդասարյանը:

«Իսկ մենք նախապայմաններով որևէ համաձայնագիր չենք ստորագրելու: Այդ իսկ պատճառով, եթե այս շարունակությունը պետք է լինի, և եթե Թուրքիան չի արձագանքում, բնականաբար, այն, ինչ հայտարարել է ՀՀ նախագահը, դրա ընթացքը կտեսնեք ապագայում: Դրա հետևանքները դուք կտեսնեք»,- ասաց նա:

Հարցին՝ իսկ եթե առաջիկա մեկ ամսում Թուրքիան արձագանքի և ցանկություն հայտնի շարունակելու գործընթացը, Հայաստանն ինչ կերպ կվարվի, Վահրամ Բաղդասրյանը խնդրեց ժամկետների մասին չխոսել:

«Մենք շատ արագ պետք է քննարկենք այդ հարցը: Կքննարկենք, դրա մասին տեղյակ կպահենք: Համենայն դեպս, այն, ինչ հայտարարվել է, ընթացքի և ուժի մեջ է»,- ասաց նա:

Հաջորդ ճշգրտող հարցին՝ ի՞նչ կանի Հայաստանը, եթե արձանագրություններն առ ոչինչ հայտարարելու ընթացքում դրանք մտցնի օրակարգ, ՀՀԿ-ական գործիչը նկատեց՝ նմանօրինակ հարցերը լուծվում են երկկողմանի համաձայնության դաշտում: