Ձեր վստահելի աղբյուրը

Ազգային ժողովը քննարկում է ՀՀ նախագահի ընտրության հարցը։ ԱԺ նախագահ Արա Բաբլոյանը հիշեցրեց, որ ՀՀ Սահմանադրության 125-րդ հոդվածի 3-րդ մասով և ԱԺ կանոնակարգ ՀՀ սահմանադրական օրենքի 139-րդ հոդվածի չորրորդ մասով սահմանված կարգով ՀՀ ԱԺ, ՀՀԿ և ՀՅԴ խմբակցությունների 65 պատգամավորների գրավոր դիմումով ՀՀ նախագահի պաշտոնում առաջադրվել է Արմեն Վարդանի Սարգսյանը։

Թեկնածուին ներկայացրեց Հանրապետական խմբակցության ղեկավար Վահրամ Բաղդասարյանը։

«Այսօր պատմական օր է, ՀՀ ԱԺ-ն առաջին անգամ պետք է ընտրի ՀՀ նախագահին։ Ես պատիվ ունեմ ՀՀԿ և ՀՅԴ անունից ներկայացնելու Հանրապետության նախագահի չորրորդ թեկնածուին։ Մեկ ամիս շարունակ հանդիպումներ ունենալով քաղաքական տարբեր ուժերի, հանրության լայն շրջանակները ներկայացնող գիտական, մտավորական, հասարակական, բարեգործական կազմակերպությունների, գործարար և աշխատավորական շրջանակների ներկայացուցիչների հետ, Արցախի հանրապետության ղեկավարության և սփյուռքահայությունը ներկայացնող կառույցների ու անհատների հետ, Արմեն Սարգսյանը փետրվարի 16-ին նախագահի հետ հանդիպմանն իր պատրաստակամությունը հայտնեց իր ողջ էությամբ և եռանդով ներգրավվել այս պատասխանառու գործին»,- նշեց Վահրամ Բաղդասարյանը։

Հանրապետական խմբակցության ղեկավարը գործընկերներին հորդորեց, որպեսզի կողմ քվեարկեն իրենց թեկնածուին։