Ձեր վստահելի աղբյուրը

«Հավաստում եմ իմ հարգանքը Ձեր կենսագրության, անձի հանդեպ, Ձեր հաջողությունների ու ձեռքբերումների հանդեպ»,- այսօր խորհրդարանում դիմելով ՀՀ նախագահի թեկնածու Արմեն Սարգսյանին՝ «Ելք» խմբակցության պատգամավոր Արտակ Զեյնալյանը հետաքրքրվեց նրա քաղաքացիությունից։

«Եթե անձը ՀՀ քաղաքացի է, ՀՀ Սահմանադրությունը չի բացառում այլ երկրի քաղաքացիությունը, սակայն Սահմանադրությամբ երկքաղաքացին նախագահի պաշտոնում առաջադրվել չի կարող»,- ասաց  Զեյնալյանը։

Արմեն Սարգսյանը հարցը տեղին համարեց:

«Ես, լինելով ՀՀ քաղաքացի, դիմել եմ Բրիտանիայում մշտական կեցության և քաղաքացիության 2000 թվականին, երբ ազատվեցի ՀՀ դեսպանի պաշտոնից։ Դա ինչ-որ իմաստով և ապահովության, և գործունեության համար քայլ էր, քանի որ դրանից հետո ես պետական ծառայության մասին չէի մտածում, մտածում էի, որ իմ կյանքն ուրիշ ճանապարհով պետք է գնա։ Սակայն դիմելուց և 2 տարի հետո քաղաքացիություն ստանալուց հետո այդ բոլոր տարիներին ես ինձ իրականում զգացել եմ ՀՀ քաղաքացի, դա արտահայտվել է իմ գործունեությամբ, վերաբերմունքի և շատ ուրիշ փաստաթղթերով։ Ես 2011 թվականի դեկտեմբերի 2-ից միայն ՀՀ քաղաքացի եմ», - ասաց Արմեն Սարգսյանը։

Հարցուպատասխանի մանրամասները՝ տեսանյութում։