Ձեր վստահելի աղբյուրը

Արդյոք ՀՀ նախագահի թեկնածու Արմեն Սարգսյանը նպատակահարմար կհամարի՞ հրապարակել իր քաղաքացիության վերաբերյալ փաստաթղթերը, թե ոչ, հարցեր են, որոնք ուղղված են հենց նրան: ԱԺ-ում լրագրողների հետ զրույցում այս մասին ասաց խորհրդարանի փոխնախագահ Արփինե Հովհաննիսյանը՝ պատասխանելով այն հարցին, թե արդյոք ավելի նպատակահարմար չէր լինի, եթե նախագահի թեկնածուն փաստաթղթերը հրապարակեր այս փուլում:

«ՀՀ նախագահի թեկնածու Արմեն Սարգսյանը ներկայացրեց այն հիմքերը, որոնց համապատասխան այդ իրավիճակը չպետք է դառնար քննարկման առարկա: Մասնավորապես, բրիտանական օրենքի այն դրույթները, որոնց համաձայն ոչ բնիկ բրիտանացիների համար երկքաղաքացի լինելու դեպքում դա դադարեցվում է դիմումի պահից: Ես համոզմունք ունեմ, որ եթե կա որևէ հարց, որի իրավասությունը գտնվում է ոչ թե իմ, ձեր որոշելիքի տիրույթում, այլ կոնկրետ անձի, ապա ճիշտ չէ, որ ես գնահատական հնչեցնեմ»,- ասաց ԱԺ փոխնախագահը:

Արփինե Հովհաննիսյանը հիշեցրեց, որ ՀՀ նոր նախագահն իր իրավասությունները կստանձնի ապրիլի 9-ին ԱԺ հատուկ նիստում, նույն օրը կդադարեն ՀՀ գործող նախագահի լիազորությունները և կառավարությունը հրաժարական կներկայացնի:

Հարցին, եթե Արմեն Սարգսյանն ընտրվելուց հետո ներկայացնի քաղաքացիության վերաբերյալ փաստաթղթերը և պարզվի, որ լեգիտիմության հետ կապված խնդիրներ կան, ինչ պետռք է արվի այդ ժամանակ, Հովհաննիսյանը նկատեց, որ նման դեպքերի համար կան համապատասխան ընթացակարգեր:

«Այն բոլոր տեսակետները, որոնք հնչում են, մեկնաբանություններ են: Այս պահի դրությամբ, եթե խոսքը վերաբերում է Սահմանադրության 124-րդ հոդվածի երկրորդ մասը՝ հանրապետության նախագահին ներկայացվող պահանջներին, և այդ փաստաթղթերը ըստ կանոնակարգ օրենքի, Սահմանադրության հիմքերն ապահովող փաստաթղթերին, ապա դրանք ներկայացված են պատկան մարմինների կողմից: Այս պահի դրությամբ ոչ որպես ԱԺ փոխնախագահ, ոչ որպես շարքային քաղաքացի իրավասու չեմ ոչ վիճարկելու, ոչ կասկածի տակ դնելու պաշտոնական մարմնի կողմից տրված պաշտոնական փաստաթուղթը, որով հավաստվում է Սահմանադրությամբ նախատեսված պահանջների համապատասխանության հարցը: Իրավասու մարմինը պետք է ուսումնասիրի բոլոր այն հարցերը, որ բարձրացվում են՝ այդպիսի խնդիրներ եղել են, թե չեն եղել, վեց տարվա ժամկետը լրացած է, թե ոչ:  Այս ամենը նայում է պետական մարմինը փաստաթուղթը տալուց առաջ, որով հավաստում է միայն ՀՀ քաղաքացի լինելը: Ես գիտեմ, որ իրավասու մարմինը տվել է տեղեկանքը, համաձայն կառավարության 2017 թվականի որոշման, որով միակ իրավասու մարմին ճանաչված է այդ նույն մարմինը»,- ասաց Արփինե Հովհաննիսյանը: