Ձեր վստահելի աղբյուրը

Մարտի 12-ից ապրիլի 12-ը Երևանում կայանալիք «Ֆրանկոֆոնիայի օրերի ծրագրի» այս տարվա շրջանակներում Ֆրանսիայի դեսպանությունը կներկայացնի ֆրանսերեն լեզուն և ֆրանկոֆոն մշակույթները՝ մշակութային և լեզվաբանական միջոցառումների միջոցով: Այս մասին այսօր լրագրողների հետ հանդիպմանն ասաց ՀՀ-ում Ֆրանսիայի Հանրապետության նորանշանակ արտակարգ և լիազոր դեսպան Ժոնաթան Լաքոտը։

«Ֆրանկոֆոնիայի միամսյակը մեծ դեր ունի Հայաստանում ֆրանսերեն լեզվի տեղի ամրապնդման գործում, լեզու, որով խոսում է շուրջ 274 միլիոն մարդ աշխարհում, որը համարվում է 3-րդ աշխատանքային լեզուն, համացանցի 4-րդ լեզուն, աշխարհում խոսվող 5-րդ լեզուն է և միակը՝ անգլերենի հետ միասին, որ գործածվում է 5 մայրցամաքներում»,- նշեց դեսպանը։

Ժոնաթան Լաքոտի խոսքով՝ Ֆրանկոֆոնիայի միամսյակի ընթացքում ֆրանսիական մշակույթը կներկայացվի կինոյի, պատկերապատման, երաժշտության, թատրոնի և  գաստրոնոմիայի միջոցով:

«Ծրագիրը կբացվի մարտի 12-ից 18-ը Մոսկվա կինոթատրոնում, Շվեյցարիայի դեսպանության և Կանադայի դեսպանության հետ համագործակցությամբ կազմակերպված Ֆրանկոֆոն ֆիմերի 2-րդ փառատոնով։ Ուշադրության կենտրոնում կլինեն նաև գաստրոնոմիան և պատկերապատումը, որի շրջանակներում մարտի 19-ից 22-ը սպասվում է ֆրանսիահայ շեֆ խոհարար և «Բոքյուս մագազին» հանդեսի գլխավոր խմբագիր Սոնյա Եզգյուլյանի և նկարազարդող և դիզայներ Գիյոմ Լոնի այցը։ Մյուս միջոցառումը « Et en plus je parle français…en Arménie ! » (Եվ բացի այդ՝ ես խոսում եմ ֆրանսերեն … Հայաստանում) տեսահոլովակի և բանավոր խոսքի մրցույթն է, որը կմեկնարկի 2018թ. մարտի 20-ին Հայաստանում Ֆրանսիայի դեսպանության մշակութային նորությունների  կայքում:

Մրցույթը կնպաստի հանրության լայն շրջանակներում և մասնավորապես երիտասարդության շրջանում ֆրանսերեն լեզվի կիրառման խթանմանը։ Լավագույն 6 թեկնածուները հնարավորություն կստանան լուսանկարվել պրոֆեսիոնալ լուսանկարչի կողմից և դառնալ Հայաստանում ֆրանսերեն լեզվի դեսպանները (նրանց լուսանկարները կցուցադրվեն Երևանի փողոցներում)։ Առաջին մրցանակը շահած մասնակիցը կստանա Ֆրանսիա ճանապարհորդելու հնարավորությունը»,- մանրամասնեց դեսպանը։

Նա ընդգծեց, որ մարտի 30-ին և 31-ին Գյումրին կհյուրընկալի Հայաստանում Պատանի ֆրանկոֆոնների թատերական ազգային 2-րդ՝ «10-ից 10» փառատոնը: «Avant-scène » ասոցիացիայի կողմից կազմակերպված այս փառատոնը, որ համախմբում է 13-ից 19 տարեկան շուրջ 100 աշակերտ, առաջարկում է ներկայացումներ, շվեյցարացի հեղինակ Էմանուել դել Պիանեի մասնակցությամբ սեմինարներ և թատերական հանդիպումներ։

«Ֆրանկոֆոնիայի օրերը կփակվեն Ժյուլ Մասնեի Մանոն կատակերգական օպերայով, որը կներկայացվի ֆրանսերեն տարբերակով 2018թ. ապրիլի 11-ին և 12-ին Ա. Սպենդիարյանի անվ. Օպերայի և բալետի ազգային ակադեմիական թատրոնում»,- եզրափակեց դեսպանը։