Ձեր վստահելի աղբյուրը

Հայաստանում  խաղալիքների շուկան  ամենառիսկային ոլորտներից մեկն է: Այս մասին այսօր  լրագրողների հետ հանդիպման ժամանակ ասաց ՀՀ տնտեսական զարգացման և ներդրումների նախարարության շուկայի վերահսկողության տեսչական մարմնի ղեկավարի տեղակալ Արթուր Մկրտչյանը՝ հավելելով, որ այդ ոլորտը գտնվում է տեսչական մարմնի ամենօրյա վերահսկողության ներքո:

Նրա խոսքով՝ ոլորտի առավել ռիսկայության մասին է վկայում Հայաստանի տարածք խաղալիքների ներմուծումների վերաբերյալ տվյալների վերլուծությունը: Ըստ նրա՝ 2017 թվականին խաղալիք արտադրող և ներմուծող տնտեսվարող 18 սուբյեկտների  մոտ իրականացրել են ստուգումներ, արդյունքում՝  12-ի մոտ հայտնաբերել են խախտումներ, այդ թվում՝  համապատասխանության սերտիֆիկատի,  մակնշման բացակայություն:

Նա նաև նշեց, որ 2016 թ-ին  խաղալիք ներմուծել է 59 ընկերություն, որից  համապատասխանության սերտիֆիկատ է ստացել ընդամենը 4-ը կամ 6.8%-ով: 2017 թ-ին խաղալիք ներմուծած 76 սուբյեկտներից համապատասխանության սերտիֆիկատ է ստացել 14-ը կամ 18.4 տոկոսը։ 

Արթուր Մկրտչյանը հայտնեց, որ 2018թ-ին  ստուգումներ կանցկացվեն 240 տնտեսվարողի մոտ. դրանցից  49-ը խաղալիք արտադրող և ներմուծող ընկերություններն են:

«Իրազեկ և պաշտպանված սպառող» ՀԿ-ի հանրային կապերի պատասխանատու Սիրանույշ Զաքարյանը նշեց, որ իրենց կազմակերպությունը ևս խաղալիքների շուկայում իրականացրել է հետազոտություն՝ տնտեսվարողների և բնակչության շրջանում:

Հարցման արդյունքնում պարզվել է, որ բնակչության 54%-ը խաղալիք է գնում մոտակա խանութից, 26 %-ը՝ խաղալիքների մասնագիտացված խանութներից, 12%-ը՝ մեծածախ խանութներից:

Հարցին՝ խաղալիք գնելիս ինչին են ուշադրություն դարձնում, հարցման մասնակիցների ընդամենը 6%-ն է նշել՝  խաղալիք ձեռք բերելիս պահանջում է անվտանգությունը հավաստող սերտիֆիկատ, 41%-ը ուշադրություն է դարձնում գնին, 15%-ը՝ մակնշմանը, իսկ հարցվածների 38%-ի համար  կարևոր է խաղալիքի արտաքին տեսքը:

Ինչ վերաբերում է տեղեկացվածությանը, թե ինչ վտանգներ կարող են ներկայացնել խաղալիքները երեխաների համար, հարցվածների 61 տոկոսը նշել է, որ դրանք կարող են վտանգ ներկայացնել, բայց ստուգող հարցին՝ կոնկրետ ինչ վտանգներ, հարցվածների միայն 28 տոկոսն  է կարողացել թվարկել վտանգների մասին: Վտանգներից, ինչպես նշեց Սիրանույշ Զաքարյանը, հարցվածները,  մասնավորապես,  նշել են՝ խաղալիքներում թունավոր նյութերի պարունակությունը, երեխաների մոտ առաջացող ինֆեկցիայի, հոգեկան հիվանդությունների մասին: