Ձեր վստահելի աղբյուրը

«Եթե «Հանրաքվեի մասին» օրենքի նախագիծը չի հավակնում ընտրական նոր մշակույթ ապահովել Հայաստանում, ապա նպատակահարմարության տեսանկյունից խիստ վիճելի է նման օրենքի առկայությունը»,- այս մասին այսօր խորհրդարանի արտահերթ նիստում հայտարարեց «Ծառուկյան» խմբակցության պատգամավոր Գևորգ Պետրոսյանը:

Նրա խոսքով՝ կյանքը ցույց տվեց, որ ընտրություններ կամ հանրաքվե կազմակերպելիս հիմնականում երկու թիրախային կետի վրա պետք է ուշադրություն դարձնել՝ նախընտրական քարոզարշավի օրինական դարձնելու և ընտրությունների արդյունքները ճանաչելու գործընթացներին։

«Այս իմաստով, այս նախագիծը ոչնչով չի տարբերվում ընտրական օրենսգրքից: Նախագծում կտրականապես արգելվում է նախընտրական քարոզչություն իրականացնել մի շարք կատեգորիայի անձանց՝ առանց վերապահման, իսկ դժբախտաբար, ընտրակեղծարարության մեջ ներգրավվող կատեգորիաներին արգելվում է քարոզչությամբ զբաղվել միայն իրենց աշխատանքային պարտականությունները կատարելու ժամանակ: Խոսքը ուսումնադաստիարակչական հասատատությունների աշխատողների մասին է»,-հայտարարեց Գևորգ Պետրոսյանը:

Պատգամավորի կարծիքով՝ հանրաքվեի կազմակերպման գործընթացում տարածված խախտումներից խուսափելու համար ճիշտ կլինի մանկավարժական կադրերին ընդհանրապես արգելել զբաղվել նախընտրական քարոզչությամբ։

«Ելք» խմբակցության պատգամավոր Արտակ Զեյնալյանն պաշտպանեց իր գործընկերոջ հնչեցրած տեսակետները՝ շեշտելով, որ ուսուցիչները չպետք է քարոզչությամբ զբաղվեն ոչ աշխատանքի ժամին, ոչ դրանից դուրս:

«Ուսուցիչներին պետք է ժամանակավորապես արգելվի իրականացնել քարոզչություն: Առաջին հայացքից կարող է թվալ, որ խտրականություն է նրանց նկատմամբ, բայց դա արդարացված է հետևյալ հանգամանքով։ Այսօր ՀՀ-ում արդեն իսկ կա խտրականություն, քանի որ ուսուցիչների ավելի քան 90 տոկոսը նույն կուսակցության անդամ է: Քանի դեռ չի վերացել այդ խտրական մոտեցումը, առաջարկում են արգելել ժամանակավորապես ուսուսցիչներին զբաղվել քարոզչությամբ, որովհետև այդ կուսակցության անդամները հասարակության մեջ կազմում են 5 տոկոս, մինչդեռ ուսուցչական կազմում 90 տոկոս են»,- նշեց «Ելք»-ի պատգամավորը։