Ձեր վստահելի աղբյուրը

Դեղատոմսային համակարգի անցնելու հարցը դրված է կառավարության նիստում՝ կասեցնել, թե ոչ: Մինչ դեղատոմսերին անցնելու օրը առողջապահության նախարարություն ու նախարարին  տրված հարցերը մնում էին օդում: Հասկացանք՝ դեղերի օգտագործումը հնարավորինս պիտի քչացնել, մանավանդ հորմոնայինն ու հակաբիոտիկները, դա պարզ է, բայց.

Նախքան դեղերի՝ դեղատոմսերով բաց թողնումը  հրահանգելը, ի՞նչ միջոցառումներ են իրականացվել ընթացքը «առանց ցնցումների» կազմակերպելու համար։

Արդյո՞ք մարզային բոլոր գյուղերը ապահովված են բուժաշխատողներով, ովքեր դուրս կգրեն դեղատոմսերը անվճար՝ ինչպես պոլիկլինիկաներում։

Արդյո՞ք հիվանդները, ովքեր ինքնուրույն տեղաշարժվելու խնդիրներ ունեն, ապահովված են բժիշկների այցով և, հետևաբար՝ դեղատոմսերով ու դրանց առաքումով։

Արդյո՞ք հատուկ դեղատոմսերի օրինակներ են տպագրված, թե բժշկի անձնական բլանկի վրա գրված դեղացանկը կարող է ընդունվել դեղատան կողմից։

Արդյո՞ք սոցիալական գովազդը, որ դեղատոմսերը անվճար են բաց թողնվում ու դրանք վաճառողները օրինախախտ են ու կպատժվեն՝ պատշաճ  արվում է։

Արդյո՞ք դեղատոմսերին անցումը՝ առանց ապահովելու դրանց պատշաճ անցումը, ընդամենը «քաղաքակիրթ» երևալու ձևականություն չէ փաստացի:

Ինչպես էր  պատրաստվում ՀՀ ԱՆ-ն արագ կարգով վերը նշված հարցերի լուծումները ապահովել՝ մինչև մարտի մեկը, կամ՝ ինչպես կարող էր առողջապահության քաղաքականությունը ապահովող կառույցը այսքան անպատրաստ լինել՝ դեղատոմսերին անցում կատարելիս:  Ինչու պիտի լրագրողները շատ ավելի լավ տեսնեն բոլոր այն խնդիրները, որ մի ամբողջ համակարգ կոչված է իր նեղ ոլորտում դրանք տեսնելու ու լուծելու:

Ու ահա, հարցերին պատասխանելու փոխարեն, խնդիրը մտնում է կառավարություն՝ եղյալ կամ չեղյալ (կասեցված) լինելու:

Եթե հաստատվի՝ հարցերը ու դրանցից բխող անհարմարություններն ու խնդիրները մնում են ու մենք ստիպված կլինենք դրանք ժամանակ առ ժամանակ նորից ու նորից բարձրաձայնել:

Եթե կասեցվի, ապա կստացվի, որ առողջապահության նախարարությունը մոտ ժամանակում պատրաստ չէ լուծել բարձրաձայնված խնդիրները, և ավելի հարմար է ուղղակի այս պահին հրաժարվել դեղատոմսերից՝ սա էլ երկու: