Ձեր վստահելի աղբյուրը

«Ես չգիտեմ, դա Մանվել Գրիգորյանի կարծիքն է, իրեն երևի հարցնեք, որովհետև ինքը լավ գիտի Արցախը, պայքարը, և ակնկալիքները տարբեր մարդկանցից տարբեր են լինում»,- ԱԺ-ում լրագրողների հետ զրույցում ասաց ՀՀ նախկին ոստիկանապետ, ԱԺ ՀՀԿ խմբակցության պատգամավոր Ալիկ Սարգսյանը՝ անդրադառնալով ԵԿՄ վարչության նախագահ, գեներալ Մանվել Գրիգորյանի երեկվա այն հայտարարությանը, որ ՀՀ նախագահ Սերժ Սարգսյանն իր փորձով և վաստակով անփոխարինելի է, իսկ վարչապետ Կարեն Կարապետյանն Արցախից և պատերազմից ոչինչ չգիտի:

Ալիկ Սարգսյանը նշեց՝ վարչապետի թեկնածուի հարցը երբ քննարկվի, ինքը կասի իր դիրքորոշումը:

Հարցին՝ ո՞վ պետք է լինի ՀՀ հաջորդ վարչապետը՝ Սերժ Սարգսյանը, թե՞ Կարեն Կարապետյանը, պատգամավորը պատասխանեց. «Իզուր եք հարցն էդքան կոնկրետացնում, ես հիմա էդ հարցին չեմ էլ ուզում պատասխանել, ես բնականաբար, իմ կարծիքը ունեմ, բայց օրը կգա, և ես կասեմ, թե ում փորձն է ավելի շատ, ով միջազգային ատյաններում ավելի պատշաճ  կարգով կներկայացնի Հայաստանը»:

Ո՞վ է նա, կեսկատակ շարունակեցին հետաքրքրվել լրագրողները: Սարգսյանն ի պատասխան ասաց. «Ով է նա երգը կլսեք: Սերժ Սարգսյանին համոզելու կարիք այս պահին չկա: Պահը գա, մեր կարծիքը կասեմ, իմ կարծիքը կասեմ: Չեմ ուզում ուղղակի հիմա նախահարձակ լինեմ մեկի պաշտոնին, սկսեմ գուշակումներ անել, դա շատ վատ բան է»: