Ձեր վստահելի աղբյուրը

ՀՀ ԱԺ նախագահ Արա Բաբլոյանն այսօր Լիոնի քաղաքապետ Ժորժ Քեփենեկյանի գլխավորած պատվիրակության հետ հանդիպմանը անդրադարձել է հայ-ֆրանսիական միջպետական հարաբերություններին, գոհունակությամբ ընդգծել քաղաքական երկխոսության բարձր մակարդակը բարեկամ երկրների միջև:

ԱԺ հանրային կապերի վարչության հաղորդմամբ՝ Արա Բաբլոյանը կարևորել է հոկտեմբերին Ֆրանկոֆոնիայի գագաթաժողովի անցկացումը Հայաստանում՝ համարելով այն լրացուցիչ հարթակ հայ-ֆրանսիական հարաբերություններն առավել խորացնելու գործում:

Խոսելով Լիոնի քաղաքապետի գլխավորած պատվիրակության այցի մասին՝ խորհրդարանի ղեկավարը նշել է, որ բազմանդամ պատվիրակության այցի ընդգրկուն ծրագիրը հավաստում է, որ հայ-ֆրանսիական ապակենտրոնացված համագործակցությունը գտնվում է բարձր մակարդակի վրա: ՀՀ ԱԺ նախագահը հույս է հայտնել, որ այս այցը կնպաստի համագործակցության բազմաթիվ ոլորտներում նորանոր նախագծերի իրագործմանը:

Լիոնի քաղաքապետն իր հեթին նշել է, որ նոր էջ է սկսվում երկու քաղաքների բարեկամության և համագործակցության պատմության մեջ:

Անդրադառնալով Ֆրանկոֆոնիայի գագաթաժողովի անցկացմանը Երևանում՝ Ժորժ Քեփենեկյանը փաստել է, որ այն բացառիկ հնարավորություն է Հայաստանի համար և պետք է ընդգրկի համագործակցության բազմաթիվ բնագավառներ՝ հնարավորություն տալով ֆրանսիացի գործարարներին արժանավայել ներկայանալու Հայաստանում: Լիոնի քաղաքապետի խոսքով՝ ֆրանկոֆոնիան արժեհամակարգ է, քաղաքականություն, ինչպես նաև համագործակցություն՝ առանց սահմանների: