Ձեր վստահելի աղբյուրը

Հայաստանում գրանցված է 46 հազար 700 գործազուրկ կին: Նրանք կազմում են ընդհանուր գործազուրկների 66.7 տոկոսը: Նման տվյալներ են Panorama.am-ին տրամադրել Զբաղվածության պետական գործակալությունից:

Ընդհանուր առմամբ, այս տարվա հունվարի 1-ի դրությամբ աշխատանք փնտրողների թիվը կազմում է 86.0 հազար մարդ, որը նախորդ տարվա նույն ժամանակահատվածի նվազել է 10.2%-ով: Գյուղաբնակները կազմում են աշխատանք փնտրողների 35.5%-ը, որը նախորդ տարվա նույն ժամանակահատվածի համեմատ նվազել է 10.9%-ով:

Գործազուրկների թվաքանակը կազմում է  աշխատանք փնտրողների 81.7%-ը կամ 70.2 հազար մարդ: Այս ցուցանիշը նախորդ տարվա նույն ժամանակահատվածի նկատմամբ նվազել է 12.7%-ով:

Առաջին անգամ աշխատանք փնտրողների թիվը կազմում է 35.6 հազ. մարդ, որից 16-29 տարեկան երիտասարդները կազմում են 41.2%-ը:

Նախորդ տարվա ընթացքում աշխատանքի է տեղավորվել 9 հազար 300  աշխատանք փնտրող, նրանից 5800-ը կանայք են:

Զբաղվածության կարգավորման պետական ծրագրերում առավել մեծ թվով կանայք են ընդգրկվում, այսպես  հունվարի 1-ի դրությամբ զբաղվածության կարգավորման պետական ծրագրով իրականացվել է.

1. «Աշխատաշուկայում անմրցունակ անձանց աշխատանքի տեղավորման դեպքում գործատուին միանվագ փոխհատուցման տրամադրում» ծրագիրը, որում ընդգրկվել է 1076 անձ, նրանցից 71%-ը կանայք են:

2. «Ձեռք բերված մասնագիտությամբ մասնագիտական աշխատանքային փորձ ձեռք բերելու համար գործազուրկներին աջակցության տրամադրում» ծրագիրը, որում ընդգրկվել է 511 անձ, որից 87.1%-ը կանայք են:

3. «Մասնագիտական ուսուցման կազմակերպում» ծրագիրը իրականցնելու 500 անձի համար կազմակերպվել է մրցույթ, սակայն պայմանագիր է կնքվել 172 գործազուրկի հետ, որից 88.5%-ը կանայք են: