Ձեր վստահելի աղբյուրը

ԱԺ «Ելք» խմբակցության պատգամավոր Լենա Նազարյանը ի սկզբանե սխալ է համարում քաղաքականության մեջ սեռերի տարանջատումը, քանի որ գտնում է՝ բոլորը պետք է հավասար իրավունքներով օժտված լինեն։

«Երբ կնոջը հարցնում են՝ ինչպես է իրեն զգում քաղաքական միջավայրում, կարծես դա պետք է անսովոր լինի իգական սեռի ներկայացուցչի համար, կարծես կինը դրանից պետք է անհարմար զգա։ Ես համոզված եմ, որ կինը քաղաքականության մեջ նույնքան նորմալ երևույթ է, ինչպես տղամարդը։ Այսնինք՝ նման հարցադրումները պետք է մոռանալ, կանանց այլևս չհարցնել՝ ինչպես եք Ձեզ զգում քաղաքականության մեջ»,- Panorama.am-ի թղթակցի հետ զրույցում ասաց նա։

Պատգամավորն ընդգծեց, որ ԱԺ-ում իրեն շատ հարմարավետ է զգում, ակտիվորեն աշխատում է, պատրաստվում է նույնքան ակտիվ աշխատել նաև մարտի 8-ին։

«Տոնական օրերն ինձ ավելի շատ ուրախացնում են այն առումով, որ ոչ լիագումար, ոչ հանձնաժողովի նիստեր չեն լինի, և ես առիթ կունենամ սկսելու կամ ավարտելու իմ աշխատանքի հետ կապված բազմաթիվ գործեր, կկարողանամ հարցումներ պատրաստել և քաղաքացիների հետ հանդիպել։ ԱԺ-ում ես ինձ շատ լավ եմ զգում։ Իհարկե, դժվարություններ ևս կան։ Դժվարություն է օրինակ այն, որ քաղաքական միջավայրը շատ կոշտ է, պետք է պատրաստ լինես պատասխան տալ և նաև պատասխան ստանալ։

Իհարկե, շատ ավելի լավ է, երբ այդ ամենն արվում է խաղի կանոններով, երբ այդ կաննոները հանրային և բաց են, երբ քննադատությունը տեղին է՝ թեկուզ սուր։ Ուզում եմ, որ կանանց վերաբերվեն որպես գործընկերների, ոչ թե որպես քվոտայով անցած մարդկանց»,- ասաց Լենա Նազարյանը։

Պատգամավորը նաև կարևորեց կնոջ՝ իրեն ճիշտ դիրքավորելու ունակությունը։ Ըստ նրա՝ կանայք պետք է ավելի ակտիվ և նախաձեռնող լինեն, այդ թվում՝ սեփական իրավունքների պաշտպանության առումով։