Ձեր վստահելի աղբյուրը

Թբիլիսիի Պ. Ադամյանի անվան հայկական պրոֆեսիոնալ պետական դրամատիկական թատրոնի շենքը պետք է քանդվի, նոր շենք կառուցվի: Մարտի 13-ին լրագրողների հետ զրույցում թատրոնի գեղարվեստական ղեկավար Արմեն Բայանդուրյանը նշեց, որ այս նորությունը տարատեսակ մեկնաբանությունների տեղիք է տվել, հնչել են կասկածներ, դժգոհություններ, թե շենքը պետք չէ քանդել:

Նա ասաց, որ եղան մասնագետների ուսումնասիրություններ, հաշվարկներ, հասկացան, որ վերանորոգման դեպքում թատրոնը սեյսմակայուն չի լինի, բացի այդ, շենքը քանդելով, զրոյից նոր շենք կառուցելով նաև ժամանակ են շահում՝ մոտավորապես մեկ տարի: Շենքի կառուցման ծախսերը հոգում է բարերարը: Թատրոնի ներկայիս շենքի շինարարությունը սկսվել է 1932-ին, այն հանձնվել է շահագործման 1936-ին: Բայանդուրյանը նշեց, որ բոլոր փաստաթղթերը պատրաստ են, մնում է քաղաքապետի ստորագրությունը: Շենքի քանդելը կտևի երեք ամիս, մինչև դեկտեմբերի 28-ը շենքի կմախքը կլինի, կմնան ներքին աշխատանքները, որոնք կտևեն էլի տարիուկես: Թատրոնի գեղարվեստական ղեկավարի խոսքով՝ նոր շենքը կլինի Վրաստանի լավագույն թատերական շենքերից լավագույնը:

«Հաճախ գրում են՝ թատրոնը չի գործում. այս նախադասությունը բոլորին սպանում է, թատրոնը գործում է, շենքը չի գործում. յոթ տարվա ընթացքում ամեն տարի չորս-հինգ ներկայացում է պատրաստվել, տարին հիսուն ներկայացում ենք խաղում, թատրոնը վերջերս վերադարձել է Հունաստանից՝ Կատերինե քաղաքում միջազգային փառատոնից»,- ասաց նա՝ հավելելով, որ դատարկաձեռն չեն վերադարձել, այլ՝ մրցանակներով:

Ներկայում թատրոնը գործում է Գրիբոյեդովի թատրոնի շենքում: Բայանդուրյանի խոսքով՝ դերասանի համար դժվար է, երբ իր շենքում չէ, կարծես ուրիշի տանը լինի, բայց վստահ է՝ շուտով կվերադառնան իրենց տուն:

Թատրոնի ապագա պլանների մասին խոսելով՝ գեղարվեստական ղեկավարն ընդգծեց՝ թատրոնը գործարան չէ, որ հստակ ասեն՝ երկու կամ երեք տարի հետո ինչ է անելու. թատրոնը գուցե ծրագրի ինչ-որ բան, բայց այդ երկու տարում այնպիսի հանճարեղ գործեր ծնվեն: Այսօր թատրոնի խաղացանկում 35 ներկայացում կա, ընդգրկված են թե հայ, թե վրաց դասականների գործերը, չեն անտեսվում նաև ժամանակակիցները:

«Գերագույն խնդիրն այն է, որ լավ գրականություն մատուցվի: Մեր թատրոնում երիտասարդ կազմ է, բոլորը ունեն թատերական կրթություն: Սա շատ կարևոր է՝ դրսում գտնվող պետական թատրոնի ստեղծագործական կրթությունը: Այսօրվա մեր երիտասարդությունը բարեկամություն է անում վրաց թատրոնի երիտասարդների հետ, ինչը նույնպես կարևոր է»,- ասաց նա:

Հայաստանը թատրոնին տարեկան 15 մլն դրամ է հատկացնում՝ բեմադրություների, շենքի վարձակալության համար: Ու թեպետ թատրոնի բյուջեն այսօր այն հնարավորությունը չունի, որ դերասանը կարողանա լավ ապրել, բայց վերանորոգումից հետո նրանց խոստացել են ֆինանսների լուրջ ավելացում: Թատրոնի խաղացանկում ընդգրկված ներկայացումները թարգմանվում են վրացերեն, դա, ըստ Բայանդուրյանի, շատ կարևոր է, քանի որ վրացի հանդիսատես էլ է գալիս, ովքեր կարողանում են ականջակալներով հետևել ներկայացմանը:

«Մենք մեզ Վրաստանում երկրորդ կարգի թատրոն չենք զգում, Վրաստանի մշակույթի նախարարը մեզ մոտ ավելի շատ է գալիս, քան մյուս թատրոններ»,- ասաց նա:

Թբիլիսիի հայկական թատրոնն այսօր ներկայացում ունի Երևանում՝ Պարոնյանի անվան կոմեդիայի թատրոնում: «Օրը անձրևոտ» ներկայացման հեղինակը թատրոնի գեղարվեստական ղեկավար Արմեն Բայանդուրյանն է: Սա նրա ութերորդ պիեսն է, որ ներկայացվում է «Արտավազդ» մրցանակաբաշխության շրջանակներում:

Թատրոնի տնօրեն Լուիզա Խաչատուրովան, ով չորս տարի է՝ պաշտոնավարում է, նշեց, որ այսօր թատրոնը մեկ խնդիր ունի, այն է՝ շենքի հարցը: Նա ասաց, որ նոր շենքի հետ կապված մեծ հույսեր ունեն, իրենց խոստացել են՝ շատ տարածքներ կավելանան, նաև՝ թանգարաններ:

«162 տարեկան է մեր թատրոնը, շատ նյութեր ունենք, որ կարող ենք ցույց տալ հայ հանդիսատեսին, վրաց հանդիսատեսին: Վերջին 10 տարիներին վրաց հանդիսատեսը, չնայած շենքի բացակայությանը, պարբերաբար հաճախում է մեր թատրոն, և Դումբաձեի «Մեղադրական եզրակացությունը» մեր թատրոնը խաղաց վրացերեն»,- ասաց նա՝ նշելով, որ թատրոնի խաղացանկում դա միակ ներկայացումն էր, որ վրացերեն էր: