Ձեր վստահելի աղբյուրը

Հայաստանի առաջադիմական կոմունիստական կուսակցության նախագահ Վազգեն Սաֆարյանը մեծ հույսեր է կապում ՀՀ չորրորդ նախագահի պաշտոնում ընտրված Արմեն Սարգսյանի հետ։ Բացի այդ՝ կուսակցությունը նոր ձևավորվելիք կառավարությունից տնտեսական ոլորտում լուրջ փոփոխություններ է ակնկալում: Այս մասին նա ասաց այսօր տեղի ունեցած մամուլի ասուլիսի ժամանակ։

«Մենք թևակոխում ենք կառավարման որակական նոր փուլ։ Կողմ ենք, որ հանրապետությունն ունենա խորհրդարանական համակարգ, և կուսակցությունները հնարավորինս շատ ներկայացված լինեին ԱԺ-ում,  որպեսզի նրանք կարողանային ներկայացնել իրենց գաղափարները: ՀՀ նորընտիր նախագահ Արմեն Սարգսյանը հանդիպում է ունեցել մեր կուսակցության նախագահության անդամների հետ, մեզնից յուրաքանչյուրը  ներկայացրել իր մոտեցումները Հայաստանի ապագայի վերաբերյալ թե՛ տնտեսական, թե՛ արտաքին քաղաքական ուղղությամբ, և թե՛ այն բարոյահոգոբանական իրավիճակի, որում հայտնվել ենք:

Կարծում եմ՝ նորընտիր նախագահը, թեև առաջնային մանդատով օժտված չի լինելու, ամեն դեպքում նա համարվում է պետության  գլուխ, և նրա հետ հույսեր ենք կապում»,-նշեց բանախոսը՝ հավելելով, որ նոր ձևավորվելիք կառավարությունից կուսակցության հիմնական սպասումները կապված են արդյունաբերական և գյուղատնտեսական ոլորտների հետ:

Ինչ վերաբերում է նախորդ ամիս ՀՀ ազգային վիճակագրական ծառայության կողմից հրապարակված տվյալներին, համաձայն որոնց նախորդ տարի Հայաստանի տնտեսությունը գրանցել է 7.5 տոկոս աճ, Վազգեն Սաֆարյանը շեշտեց, որ թեև մի շարք ոլորտներում դրական տեղաշարժեր կան, այնուամենայնիվ, տնտեսական աճի ազդեցությունը նախևառաջ պետք է յուրաքանչյուր մարդ զգա անձամբ իր վրա:

«Դա նախևառաջ պետք է ազդեցություն ունենար սոցիալական վիճակի վրա, աշխատավարձերի, կենսաթոշակների բարձրացման: Գուցե հունիսից հետո կառավարությունը շտկում մտցնի, և փորձեն ավելացնել թոշակներն ու աշխատավարձերը, որը և կլինի ուղիղ համեմատական այդ տնտեսական աճին»,-ընդգծեց Սաֆարյանը:

Վազգեն Սաֆարյանը խոսեց նաև ներկայիս ընդդիմության մասին՝ նշելով, որ խորհրդարանում գործող ընդդիմությունը գաղափարական չէ, այլ պարզապես ընդդիմություն է իշխանության նկատմամբ, որը դեմ չի գնում այժմյան տնտեսական քաղաքականությանը:
«Այդ ռադիկալ կոչերով նրանք պարզապես ցույց են տալիս, որ ընդդիմություն են, բայց, կարծում եմ, ժողովուրդը վաղ թե ուշ կհասկանա, թե ովքեր են իր կողքին և ովքեր են պայքարում սոցիալական խնդիրների դեմ»,-ասաց նա։

Հարցին, թե ո՞վ է ՀՀ վարչապետի ամենապահանջված թեկնածուն, Վազգեն Սաֆարյանը խուսափեց անուններ հնչեցնել և նշեց, որ այժմ կուսակցությունը սպասողական դիրքորոշում ունի, այդ հարցը պետք է լուծի Հանրապետական կուսակցությունը: