Ձեր վստահելի աղբյուրը

Երևանում Ռուսական արվեստի թանգարանում բացվեց  «Գողացված Վռուբելի վերադարձը» ցուցահանդեսը: Հանճարեղ նկարիչ Միխայիլ Վռուբելի գողացված «Դևը և Հրեշտակը Թամարի հոգու հետ» նկարի վերադարձին նվիրված ցուցահանդեսի բացումը հանրության առջև բաց կլինի սույն թվականի մարտի 20-ից մինչև սույն թվականի նոյեմբերի 20-ը Ռուսական արվեստի թանգարանում:

Բացման արարողության նախորդած մամուլի ասուլիսի ժամանակ ՀՀ Մշակույթի նախարար Արմեն Ամիրյանն նշեց, որ այս նկարի միջոցով փորձելու են արժևորել Ռուսական արվեստի թանգարանի գործառույթներն ու հավաքածուն։

«Այս նկարի, այս պատմության միջոցով փորձելու ենք նաև թնագարանն առավել հասանելի դարձնել և ՀՀ քաղաքացիներին, և Հայաստան այցելած զբոսաշրջիկներին։ Ինչ-որ տեղ հրեշտակային նվեր էր կտավը թանգարանին։ Կենտրոնում ունենալով այս ցուցադրությունը՝ կկարողանանք ապահովել թանգարանի այցելությունների քանակի ավելացումը։ Համոզված ենք, որ այս տարի Վռուբելի նկարը հզոր շարժառիթ կդառնա թանգարանին նոր շնչառություն տալու համար»,- նշեց նախարարը։

Ռուսական արվեստի թանգարանի տնօրեն Մարինե Մկրտչյանի խոսքով՝ ստեղծագործությունը շատ կարևոր է թանգարանի համար թե իր գեղարվեստական, թե պատմական նշանակությամբ։
«Բացի այս ցուցադրությունից թանգարանն ունի հագեցած ծրագիր։ Մինչև նոյեմբեր տարբեր միջոցառումներ կիրականացվեն թանգարանում,  սակայն կարևորներից կառանձնացնեմ Օպերայի և բալետի ազգային ակադեմիական թատրոնի ու Ռուսական արվեստի թանգարանի համագործակցությունը»,- հավելեց տնօրենը։

Հանդիմանը և բացման արարողությանը ներկա էր նաև Միխայիլ Վռուբելի «Դևը և Հրեշտակը Թամարի հոգու հետ» նկարի վերականգնող Իննա Սոլովովան, ով լրագրողների հետ կիսվեց վերականգնման աշխատանքներով։

«Բերեցին մի տուփ, որ բացելով գտա ստեծագործությանը մասնատված կտորները։ Ուղղակի արցունքներ առաջացրեց կտավի տեսքը։ Այնտեղ ընդամենը մի քանի մեծ կտոր էր, մնացածը շատ մեծ քանակությամբ մանր կտորներ էին՝ 1-2 միլիմետրանոց։ Սակայն հաջողվեց առանց վնասելու այդ փոքրիկ կտորները միացնել իրար ու վերականգնել կտավը»,- պատմեց Իննա Սոլովովան։
Իսկ թե որտեղ է եղել նկարը, որտեղ է պահվել ոը, որտեղ է պահվել, վերականգնողն ասաց, որ նման ինֆորմացիայի չի տիրապետում։

Լրագրողները Սոլովովայից հետաքրքրվեցին, թե արդյոք նկարը վերականգնումից հետո կարո՞ղ է գցել իր արժեքը, ինչին ի  պատասխան նա ասաց. «Վերականգնողը բժիշկ է, երբ բժիշկը բուժում է ձեր հարազատին, դրանից հետո այդ մարդը ձեզ պակաս հարազատ չի դառնում։ Նույնն էլ կտավի դեպքում, այն ավելի թանկ ու արժեքավոր է դառնում»։

Նշենք, որ «Դևը և Հրեշտակը Թամարի հոգու հետ» նկարի վերականգնման աշխատանքները տևել են շուրջ յոթ ամիս։

Իննա Սոլովովան պարգևատրվեց ՀՀ մշակույթի նախարարության բարձրագույն պարգևով՝ ոսկե մեդալով։