Ձեր վստահելի աղբյուրը

«Այս սահմանափակումները, որոնք արդեն կիրառելի են՝ ուսուցիչների, բուժաշխատողների համար չափազանց կարևոր նորություն են, որոնք նախկինում չեն եղել»,- այս մասին այսօր ԱԺ Պետական-իրավական և մարդու իրավունքների պաշտպանության հարցերի մշտական հանձնաժողովում ՀՀ ընտրական օրենսգիրք սահմանադրական օրենքում փոփոխություններ և լրացումներ կատարելու մասին նախագծի քննարկման ժամանակ ասաց հանձնաժողովի նախագահ Գևորգ Կոստանյանը։

Կոստանյանը մանրամասնեց, թե ինչով է պայմանավորված, որ նախընտրական քարոզչությանը  ուսուցիչներին, բուժաշխատողներին նախագծով որոշակի սահմանափակման մեջ են դիտարկում, իսկ դատախազ, դատավոր, ոստիկան, բացարձակ արգելքի դաշտ են մտցրել:

«Նախկինում որոշակի սուբյեկտներ իրավունք չունեին քարոզչություն իրականացնել իրենց ծառայողական պարտականությունները կատարելու ընթացքում: Այո, միշտ հարց էր առաջանում՝ ծառայողական պարտականությունների կատարումն աշխատաժամի մե՞ջ է, թե՞ դրանից հետո: Հիմա ավելացվել է չափազանց կարևոր ճշգրտում՝ ի պաշտոնե հանդես գալիս, այսինքն՝ ուսուցչին, բուժաշխատողին արգելվում է  քարոզչություն իրականացնել ոչ միայն ծառայողական պարտականությունների կատարման ժամանակահատվածում, այլև անգամ դրանից դուրս՝  ի պաշտոնե քարոզչությամբ հանդես գալ»,- ասաց նա:

Կոստանյանը շեշտեց, եթե ուսուցիչը կամ տնօրենը դպրոցից դուրս զանգում է որևէ ծնողի, ասում արի հանդիպենք, դա արդեն արգելվում է, դա արդեն մեխանիկորեն ի պաշտոնե հանդես գալու դրսևորում է, ինչը մեխանիկորեն հանգեցնում է իրավախախտման։

Դիմելով «Ծառուկյան» խմբակցության պատգամավոր Գևորգ Պետրոսյանին, Կոստանյանն ասաց, որ նրա մտահոգությունը բացարձակ փարատված է:

Պատգամավորն արձագանքեց, թե գուցե տնօրենը զանգում է ծնողին ու ժամադրում՝ որպես քաղաքացի:

«Եթե որպես քաղաքացի ժամադրի, կուզեք կգնաք, չեք ուզի, չեք գնա: Ցանկացած դեպքում, իրավունք ունեք, եթե գտնում եք, որ տնօրենը զանգեց, ի պաշտոնե հանդես եկավ, կարող եք չգնալ և բողոքեք: Իսկ եթե տնօրենին ընկալում եք հարազատ անձ, ձեր սուբյեկտիվ որոշելիքն է»,- նկատեց Կոստանյանը:

Նախագիծն ընդգրկվեց ԱԺ նիստերի օրակարգ և քննարկվի առաջին ընթերցմամբ։