Ձեր վստահելի աղբյուրը

ՀՀ ԱԺ պետական-իրավական և մարդու իրավունքների պաշտպանության հարցերի մշտական հանձնաժողովի նախագահ Գևորգ Կոստանյանն այսօրվա նիստում հայտարարեց, որ օրակարգում ընդգրկված է երկու հարց՝ Դատական ակտերի հարկադիր կատարման օրենքում փոփոխություններ և լրացումներ կատարելու մասին օրենքի նախագիծը և Ընտրական օրենսգիրք սահմանադրական օրենքում փոփոխություններ և լրացումներ կատարելու մասին օրենքի նախագիծը և կից ներկայացված օրենքի նախագծերը։

«Գաղտնիք չէ, որ վարչական ռեսուրսի չարաշահումը ընտրական գործընթացներում, այդ թվում նաև հանրաքվեի իրականացման գործընթացում միշտ միջազգային մասնագիտացված կառույցների զեկուցումներում տեղ են գտել՝ ասելով, որ հանրային ծառայողները, պաշտոնատար անձինք, ռիսկեր կան, որ կարող են վարչական ռեսուրսներ օգտագործել՝ ի շահ իրենց նախընտրած թեկնածուի կամ իշխող կուսակցության։ Այս նախագծով հստակ սահմանափակում են վարչական ռեսուրսի օգտագործումը նախընտրական քարոզչության ժամանակ ոչ միայն թեկնածուների, այլ նաև մնացած բոլոր անձանց համար, որոնք հնարավոր է, որ կարող են օգտագործել իրենց ռեսուրսը»,- նշեց հիմնական զեկուցող արդարադատության նախարարի տեղակալ Արթուր Հովհաննիսյանը։

Փոխնախարարի խոսքով՝ ավելացվել են սահմանափակումներ պետական հիմնարկների կամ կազմակերպությունների, համայնքային հիմնարկների կամ կազմակերպությունների, կանոնադրական կապիտալում պետական կամ տեղական ինքնակառավարման մարմինների 20 և ավելի տոկոս մասնակցությամբ կազմակերպությունների աշխատակիցներին՝ իրենց աշխատանքային պարտականությունները կատարելիս կամ ի պաշտոնե հանդես գալիս:

«Սահմանափակումները վերաբերում են նաև հանրային ծառայողներին, առողջապահական կամ բժշկական կազմակերպությունների, ուսումնական հաստատությունների, նախադպրոցական ուսումնական հաստատությունների աշխատողներին՝ իրենց լիազորություններն իրականացնելիս կամ ի պաշտոնե հանդես գալիս: Կան մի խումբ անձինք, որոնց ընդհանրապես արգելվել է քարոզչություն իրականացնել՝ դատավորներին, դատախազներին, քննչական մարմիններում, ոստիկանությունում, Ազգային անվտանգության ծառայությունում, քրեակատարողական հիմնարկներում, դատական ակտերի հարկադիր կատարման ծառայությունում, պրոբացիոն ծառայությունում, փրկարար ծառայությունում ծառայողներին, զինծառայողներին, ավելացվել է նաև  ընտրական հանձնաժողովների անդամներին, բարեգործական և կրոնական կազմակերպություններին, միջազգային կազմակերպություններին,  օտարերկրյա քաղաքացիներին և կազմակերպություններին, քաղաքացիություն չունեցող անձանց, Մարդու իրավունքների պաշտպանին, Կենտրոնական բանկի խորհրդի անդամներին, Հաշվեքննիչ պալատի անդամներին, Հեռուստատեսության և ռադիոյի հանձնաժողովի անդամներին, ինքնավար մարմինների անդամներին»,- մանրամասնեց Արթուր Հովհաննիսյանը։

Ինչ վերաբերում է լրատվամիջոցներին, փոխնախարարն ասաց, որ նրանց համար ևս սահմանափակումները հանվել են, և եթե նախկինում մեկ լրատվամիջոց կարող էր 50 լրագրող հավատարմագրել, նախագծով այդ սահմանափակումը հանվել է:

«Վարչական պատասխանատվություն է նախատեսվում վարչական ռեսուրսների օգտագործման համար, ինչպես նաև քրեական պատասխանատվություն՝ քարոզչություն կատարելուն կամ կատարելուց հրաժարվելուն հարկադրելու համար»,- հավելեց նա։