Ձեր վստահելի աղբյուրը

Երևանի ՋԷԿ նոր էներգաբլոկի 2018 թ. արդիականացման ծրագրերի արժեքը կկազմի շուրջ 15 մլն ԱՄՆ դոլար: Այս մասին լրագրողների հետ զրույցում ասաց «Երևանի ՋԷԿ» ՓԲԸ տեխնիկական տնօրեն Արկադի Գևորգյանը: Երևանի ջերմային էլեկտրակայանի համակցված շոգեգազային ցիկլով աշխատող էներգաբլոկի կառուցման համար Ճապոնիայի կառավարությունը հատկացրել է ավելի քան 220 մլն ԱՄՆ դոլար:

Էներգաբլոկի կառուցման ծրագիրը, մասնավորապես՝ շինարարական աշխատանքները մեկնարկել են 2008 թ., ծրագրի իրականացումն ավարտվել է 2010 թ.: Նույն 2010 թ. ապրիլ ամսից այն գործարկվել է և միացվել ՀՀ էլեկտրաէներգետիկ համակարգին: Գևորգյանը նշեց, որ 8 տարիների աշխատանքի արդյունքում արտադրվել է շուրջ 12 միլիարդ կվ/ժ էլեկտրաէներգիա, էներգաբլոկի դրվածքային հզորությունը կազմում է 240 մեգավատտ:

Ճապոնական միջազգային համագործակցության գործակալության ֆինանսավորմամբ՝ էներգաբլոկի կառուցման ժամանակակից տեխնոլոգիական բոլոր լուծումներն են իրականացվել՝ և ավտոմատ կառավարման առումով, և տեխնոլոգիական բոլոր նոր ձեռքբերումների: Գևորգյանը նշեց, որ այս էներգաբլոկը էներգահամակարգի ջերմային կայանների մեջ համարվում է ամենաարդյունավետը, քանի որ կոմպենսացիոն ցիկլի ՕԳԳ-ն կազմում է շուրջ հիսուն տոկոս:

«Եթե կլինի այն օրը, որ մենք կունենանք նաև ջերմային էներգիայի սպառում, էներգաբլոկը նախատեսված է նաև ջերմաֆիկացիոն ռեժիմով աշխատելու համար, և այդ դեպքում ՕԳԳ-ն դառնում է շուրջ 73-74 տոկոս: Այն աշխատում է բնական գազով, հիմնական սարքավորումները, գազատուրբինային տեղակայանքը շվեյցարական արտադրության է, իսկ շոգետուրբինային տեղակայանքը՝ ճապոնական «Ֆուջի» ընկերության, գազատուրբինը՝ 180 մՎտ, շոգետուրբինը՝ 63 մՎտ հզորությամբ»,- ասաց նա:

Գևորգյանը նշեց, որ կայանքը շահագործման ընթացքում պարբերաբար ենթարկվում է տեխնիկական սպասարկման՝ գործարանային և տարբեր տեխնիկական նորմատիվ փաստաթղթերին համապատասխան:

2018 թ. նախատեսվում է էներգաբլոկի կապիտալ նորոգման ընթացքում իրականացնել նաև գազատուրբինային տեղակայանքի «Հենիքսել 2» մոդեռնիզացիան, որը այդ գազատուրբինների համար վերջին ձեռքբերումներով՝ տեխնիկական նորամուծություններով է հագեցած: Դրա արդյունքում կլինի շուրջ 7 մՎտ հզորության ավելացում և 1 տոկոս ՕԳԳ ավելացում, այսինքն՝ ավելի շահավետ կլինի էներգաբլոկի աշխատանքը: