Ձեր վստահելի աղբյուրը

Այսօր ԱԺ Պետական-իրավական և մարդու իրավունքների պաշտպանության հարցերի մշտական հանձնաժողովում քննարկման է ներկայացվել ՀՅԴ խմբակցության ղեկավար Արմեն Ռուստամյանի կողմից հեղինակած «Ազգային ժողովի կանոնակարգ» ՀՀ սահմանադրական օրենքում փոփոխություն և լրացումներ կատարելու մասին օրենքի նախագիծը:

Նախագծով առաջարկվում է, որպեսզի խմբակցությունը յուրաքանչյուր հանձնաժողովում ունենա առնվազն մեկ պատգամավոր ներկայացնելու իրավունք:

«Եթե խմբակցության անդամների ընդհանուր թիվը փոքր է մշտական հանձնաժողովների ընդհանուր թվից, ապա խմբակցությունն իրավունք ունի իր անդամին ներկայացնելու մեկից ավելի մշտական հանձնաժողովների կազմում ընդգրկվելու համար: Այդ դեպքում խմբակցությունը յուրաքանչյուր մշտական հանձնաժողովում կարող է ունենալ ոչ ավելի, քան մեկ պատգամավոր, իսկ նույն պատգամավորը կարող է լինել ոչ ավելի, քան երեք մշտական հանձնաժողովի անդամ»,- ներկայացրեց Արմեն Ռուստամյանը։

Պատգամավորի խոսքով՝ օրենքի ընդունման անհրաժեշտությունը պայմանավորված է այն հանգամանքով, որ խորհրդարանում ներկայացված խմբակցությունների անդամների քանակը կարող է բավարար չլինել բոլոր հանձնաժողովներում ներկայացվածություն ապահովելու համար: Իսկ խմբակցությունները իրենց վերապահված պարտականությունները պատշաճ կերպով իրականացնելու համար անհրաժեշտ է, որ ներգրաված լինեն բոլոր մշտական հանձնաժողովների աշխատանքներում:

Հանձնաժողովի անդամ  Ռուստամ Մախմուդյանը նշեց. «Այն, որ պարոն Ռուստամյանի ներկայացրած մտահոգությունը արդարացի է, որևէ տեսակի երկրորդ կարծիք չկա, բայց այն որ Սահմանադրությունը և «ԱԺ կանոնակարգ» ՀՀ սահմանադրական օրենքը որոշակի սահմանափակումներ է նախատեսում, դա ակնհայտ է։ Ուստի այս երկու հատվածներում միասնական կարծիք կազմելու առումով առաջարկում եմ աշխատանաքային խմբի տեսքով վերլուծություն կատարենք, նոր կարողանանք հետևություն անել»։