Հանրային հեռուստառադիոընկերության խորհրդի անդամներին կնշանակի վարչապետը. փոխնախարար
«Հեռուստատեսության և ռադիոյի մասին» ՀՀ օրենքում փոփոխություններ և լրացումներ կատարելու մասին» օրինագծի ընդունման անհրաժեշտությունը բխում է 2015-ին ընդունված սահմանադրական փոփոխություններով: Այս մասին այսօր խորհրդարանում հայտարարեց Արդարադատության նախարարի առաջին տեղակալ Արթուր Հովհաննիսյանը:
«Եթե մինչև այս փոփոխությունները 2005 թ. սահմանադրությունը նշում էր, որ հեռարձակվող լրատվամիջոցների ազատության, բազմազանության ապահովման նպատակներից ելնելով ստեղծվում է անկախ կարգավորվող մարմին, ապա 2015-ի Սահմանադրության փոփոխություններով երկու մեծ հոդված է նվիրվել Հանրային հեռուստատեսության և ռադիոյի հանձնաժողովին, տալով նրա կարգավիճակը՝ որպես անկախ պետական մարմին, սահմանելով նրա լիազորությունները»,- ներկայացրեց փոխնախարարը։
Նրա խոսքով՝ սահմանվել է նաև, որ նրա լիազորությունների մեջ է հեռուստատեսությունների և ռադիոընկերությունների նկատմամբ վերահսկողությունը, սահմանվել է հանձնաժողովի կազմը, հանձնաժողովի անդամին ներկայացվող պահանջները:
«Ի տարբերություն 2005-ի սահմանադրության, որտեղ նշվում էր, որ անկախ գործող այս մարմնի անդամների կեսին նշանակում է ԱԺ-ն, մյուս կեսին՝ ՀՀ նախագահը, 2015 թվականի փոփոխություններով՝ հանձնաժողովի անդամների թիվը 7-ն է, որոնց բոլորին ընտրում է ԱԺ-ն՝ ձայների 3/5-րդով: Պահանջվում է, որ հանձնաժողովի անդամը պետք է բավարարի ԱԺ պատգամավորին ներկայացվող պահանջներին։ Օրինագծով հստակեցվել է Հանրային հեռուստառադիոընկերության խորհրդի կարգավիճակը, դրան համապատասխան սահմանվել է իրավասությունների շրջանակը։ Հաղորդումների բազմազանության նկատմամբ սահմանվել է վերահսկողության իրականացման կարգը: Եթե գործող օրենքով Հանրային հեռուստաընկերության և Հանրային ռադիոընկերության ղեկավար մարմինը հանդիսանում է խորհուրդը, այժմ մենք սահմանել ենք, որ այս երկու ընկերությունների ոչ թե ղեկավարման, այլ կառավարման մարմինն է հանդիսանում Հեռուստառադիոընկերության խորհուրդը: Եթե հիմա խորհրդի անդամներին նշանակում է ՀՀ նախագահը, սահմանել ենք, որ այսուհետ նշանակումն իրականացնում է վարչապետը, բայց այն անդամների շրջանակից, որոնք հանձնաժողովի կողմից սահմանված մրցույթի արդյունքում հաղթող են ճանաչվել»,- մանրամասնեց Արթուր Հովհաննիսյանը։
Նա հավելեց, որ ի տարբերություն գործող օրենքի՝ սահմանվել է, որ արտակարգ դրության ժամանակ որոշակի ժամաքանակ պետք է տրամադրել վարչապետին, ոչ թե նախագահին, քանի նոր սահմանադրական կարգավորումներով արտակարգ դրություն և ռազմական դրություն հայտարարում է ոչ թե ՀՀ նախագահը, այլ կառավարությունը։
Հարակից զեկուցող ՀՀԿ-ական պատգամավոր Արման Սաղաթելյանն իր ելույթում նշեց, որ առաջինից երկրորդ ընթերցման ժամանակահատվածում կրկին կունենան քննարկումներ. «Հուսով եմ, որ կգանք ընդհանուր հայտարարի, որին, ըստ էության, արդեն եկել ենք։ Այն ինչ չենք հասցնելու առաջինից երկրորդ ընթերցման ժամանակ այս փոփոխությունների փաթեթով ամրագրել, մենք ունենք պայմանավորվածություն և պլանավորում, որ ամբողջ մայր օրենքը, քանի որ պարունակում է բավականաչափ բարոյապես հնացած նորմեր ու կարգավորումներ, հնարավոր է այս տարվա ընթացքում նորից բերենք խորհրդարան և ունենանք քննարկում մեր գործընկերների հետ»։
Լրահոս
Տեսանյութեր
Եթե Ադրբեջանը վստահ է, ինչո՞ւ է դատական գործընթացները դադարեցնելու մասին գաղափար առաջ քաշում
